Կոռուպցիան Հայաստանում ունի խորքային արմատներ

Կոնցեպտուալ առումով սահմանադրական բարեփոխումները բավարար են` ապահովելու դատարանների անկախությունը, սակայն կա հասարակությանը վերափոխելու խնդիր. «Սիվիլիթաս» հիմնադրամում հունիսի 7-ին կազմակերպված հանդիպման ժամանակ հայտարարեց Հայաստանի արդարադատության նախարար Հրայր Թովմասյանը։

Որպես ասվածի վկայություն` նախարարը վկայակոչեց հարցումների արդյունքները, ըստ որոնց` հարցվածների 84 տոկոսը պատրաստ է կաշառք տալ զարտուղի ճանապարհներով իրենց հարցը լուծելու, իսկ 63 տոկոսը՝ անգամ օրինական հարցերին լուծում տալու համար։

Ըստ նախարարի` կոռուպցիան Հայաստանում ունի խորքային արմատներ։ Նրա խոսքերով` արդարամտություն եւ արդարադատություն կարելի է ապահովել նոր արժեհամակարգ կրող մարդկանց մուտք գործելու, ինչպես նաեւ օրենսդրությունը կոռուպցիոն ռիսկերից ձերբազատելու ճանապարհով։

Հ.Թովմասյանը չհամաձայնեց այն դիտարկման հետ, թե, համաներման հետ կապված, քրեակատարողական հիմնարկներից կան բազմաթիվ բողոքներ։ Ըստ նրա` համաներման կիրառման 11-րդ օրվա դրությամբ ընդամենը մեկ բողոք է ստացել։ «Յուրաքանչյուր խախտում խստագույնս պատժվելու է»,- հավաստիացրեց նախարարը։

Նա նաեւ տեղեկացրեց, որ ցմահ դատապարտվածների գործերը վերանայելու խնդիրը դուրս է նախարարի իրավասություններից. տեղեկացնում է «Նոյյան տապանը»: