Մոտ մեկ տոննա հերոինի հետքերով. Թուրքիայի քաղաքացին իրեն մեղավոր չի ճանաչում

927 կգ հերոինի ապօրինի շրջանառության մեջ մեղադրվող` Թուրքիայի քաղաքացի Օսման Ուգուրլուն իրեն մեղավոր չի ճանաչում, սակայն կատարած որոշ արարքների համար զղջում է և ներողություն խնդրում հայ ժողովրդից: Այս մասին yerkir.am-ին հայտնեց նրա շահերի պաշտպան Արտակ Գարոյանը և նշեց, որ Թուրքիայի Հանրապետությունը տեղյակ է դեպքի մասին:

Նա տեղեկացրեց, որ իր պաշտպանյալն օրեր առաջ հարցաքննության ընթացքում դժգոհել էր, թե առողջական խնդիրներ ունի, և ինքը միջնորդել էր նախաքննական մարմնին` իր պաշտպանյալին բուժզննության ենթարկել: «Այսօր քննիչը հայտնեց, որ նա բուժզննում է անցել, սակայն պարզվել է, որ նրա առողջությանը որևէ լուրջ բան չի սպառնում»,- ասաց փաստաբանը:

Նա նախաքննության ավարտի վերաբերյալ թեև հստակ ժամկետ չկարողացավ նշել, սակայն, հաշվի առնելով գործի աննախադեպ լինելն ու մեղադրյալների` օտարերկրյա քաղաքացի լինելու հանգամանքը, կարծիք հայտնեց, որ առնվազն 4-5 ամիս կտևի:

Հիշեցնենք, որ հունվարի 17-ին Մեղրիի մաքսատանը Իրանից ՀՀ-ի տարածքով տարանցիկ դեպի Վրաստան ուղևորվող բեռնատարի զննման արդյունքում` հատուկ հարմարեցված թաքստոցում հայտնաբերվել էր առանձնապես խոշոր չափերի`927 կգ հերոին տեսակի թմրամիջոց: Փաստի առթիվ ՀՀ Ազգային անվտանգության ծառայության քննչական վարչությունում հարուցվել է քրեական գործ` ՀՀ քրեական օրենսգրքի 215-րդ հոդվածի 2-րդ մասի հատկանիշներով:

Իրեղեն ապացույց համարվող` առգրավված մոտ մեկ տոննա հերոինը, որի գինը տարբեր հաշվարկներով սև շուկայում կարող է լինել 80-ից 200 մլն դոլար, կոչնչացվի այս գործով վերջնական դատական ակտ կայացնելուց հետո: