Մալաթիայի թաղապետի որդու սպանությունից 9 տարի անց հայտնաբերված «պատվիրատուն» իրեն մեղավոր չի ճանաչում

Մալաթիայի նախկին թաղապետ Վահան Զատիկյանի որդու՝ Սեդրակ Զատիկյանի սպանությունը կազմակերպելու մեջ մեղադրվող` դեպքից 9 տարի անց հայտնաբերված Նարեկ Խաչատրյանին մեղադրանք է առաջադրվել ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով՝ շահադիտական դրդումներով սպանություն կազմակերպելու համար։

Yerkir.am-ի գրավոր հարցմանն ի պատասխան,  ՀՀ քննչական կոմիտեից հայտնեցին, որ Սեդրակ Զատիկյանի սպանությունը կազմակերպելու մեջ մեղադրվող Նարեկ Խաչատրյանի մասով գործի կասեցված վարույթը վերսկսվել է և ներկայումս քննվում է ՀՀ քննչական կոմիտեի ՀԿԳ քննության գլխավոր վարչության վարույթում:

2015 թվականի մայիսի 18-ին Ն.Խաչատրյանին մեղադրանք է առաջադրվել և նույն օրը նրա նկատմամբ նախկինում, որպես կալանավորում, ընտրված խափանման միջոցը վերահաստատվել է: Կոմիտեից մեզ հայտնեցին նաև, որ Խաչատրյանն առաջադրված մեղադրանքում իրեն մեղավոր չի ճանաչել: Գործի նախաքննությունը շարունակվում է:

Հիշեցնենք, որ Սեդրակ Զատիկյանը սպանվել է 2006թ. հունիսի 22-ին Սեբաստիա և Տիչինա փողոցների խաչմերուկում «ԱԿՍ» տեսակի ինքնաձիգով: Զատիկյանի սպանությունը կատարելու և օժանդակելու համար դեռևս 2007-ին Մալաթիա-Սեբաստիա վարչական շրջանների ընդհանուր իրավասության դատարանի վճռով Ա. Առուշանյանը, Ա.Հովհաննիսյանը և Լ. Ղևոնդյանը դատապարտվել էին ազատազրկման, իսկ սպանության պատվիրատուների նկատմամբ հայտարարվել էր հետախուզում:

Զատիկյանի սպանությունը պատվիրելու մեջ մեղադրվող` ԱԺ նախկին պատգամավոր Հակոբ Հակոբյանի (Լեդի Հակոբի) եղբորորդին՝ Ստեփան Հակոբյանը, հայտնաբերվեց 2011 թվականի դեկտեմբերին: 2013-ի դեկտեմբերի 9-ին Մալաթիայի դատարանը Հակոբյանին մեղավոր ճանաչեց և դատապարտեց 15 տարվա ազատազրկման: