ՀՀԿ-ն անցել է գետնի տակ

Քոչարյանը խոսեց, եւ ՀՀԿ-ն էլի անցավ ջրի հատակը, մինչեւ անցնի վտանգը:

Արդեն գրել ենք, որ Ռոբերտ Քոչարյանի առաջին հարցազրույցից հետո, որում նա խիստ քննադատության էր ենթարկել Տիգրան Սարգսյանի` տարեվերջյան ասուլիսի ժամանակ հնչեցրած որոշ գնահատականներ, ՀՀԿ-ն չշտապեց պաշտպանել Տիգրան Սարգսյանին: Եթե ՀՀԿ-ական պատգամավորների դեպքում դա ինչ-որ առումով հասկանալի էր, ապա ՀՀԿ-ական նախարարների դեպքում` մեղմ ասած, տարօրինակ: Հիշեցնենք, որ նրանք հայտարարում էին, որ կա'մ չեն կարդացել հարցազրույցը, կա'մ էլ պարզապես չեն ուզում խոսել:

Հիմա` Ռոբերտ Քոչարյանի երկրորդ հարցազրույցից հետո, ՀՀԿ-ական պատգամավորներն ու նախարարներն առհասարակ անջատել են հեռախոսները կամ չեն պատասխանում հեռախոսազանգերին: Այսպես` անջատված են ՀՀԿ-ի սոխակ, միշտ խոսելու պատրաստ` ՀՀԿ խմբակցության ղեկավար Գալուստ Սահակյանի, ՀՀԿ խոսնակ, ԱԺ փոխնախագահ Էդուարդ Շարմազանովի, պատգամավորներ Մկրտիչ Մինասյանի, Արման Սահակյանի, Արտակ Դավթյանի հեռախոսահամարները: Զանգերին չեն պատասխանում ԱԺ փոխնախագահ Հերմինե Նաղդալյանը, ՀՀԿ-ական պատգամավոր Վարդան Այվազյան: Պարզվում է` հարցազրույցը դեռ չեն կարդացել Կարեն Ավագյանը, Գագիկ Մինասյանը, Արտակ Զաքարյանը, Շիրակ Թորոսյանը, Խոսրով Հարությունյանը, Սուքիաս Ավետիսյանը: Կկարդան, նոր կորոշեն, ուզում են խոսել, թե` ոչ: Երկրորդ նախագահի հարցազրույցի վերաբերյալ հրաժարվում են գնահատականներ հնչեցնել Սամվել Ֆարմանյանը, Կարինե Աճեմյանը: