Պետք է օգտվել Սարգսյան-Ալիեւ հանդիպման բացած հեռանկարից. Անրի Ռենո

Հեռանկարներ են բացվել Հայաստանի ու Ադրբեջանի նախագահների միջեւ երկխոսության եւ ԼՂ կարգավորման բանակցային գործընթացի շարունակության համար` հիմքում ունենալով այն ձեռքբերումները, որոնք նշված են Մինսկի խմբի համանախագահների երեկվա հայտարարությունում. այսօր, անդրադառնալով Վիեննայում Հայաստանի եւ Ադրբեջանի նախագահների հանդիպմանը, ասաց Հայաստանում Ֆրանսիայի արտակարգ եւ լիազոր դեսպան Անրի Ռենոն:

«Ես, բնականաբար, միանգամայն միակարծիք եմ Մինսկի խմբի համանախագահող երկրների արած հայտարարության հետ, մանավանդ, որ երեկ տեղի ունեցած հանդիպումը Սոչիում 2012 թվականին կայացած հանդիպումից` գրեթե երկու տարվա դադարից հետո առաջին հանդիպումն էր, որով խրախուսվում էր շարունակել բանակցային գործընթացը»,- նշեց Անրի Ռենոն:

Դեսպանն ընդգծեց, որ, բնականաբար ,պետք է բացվող հեռանկարներից օգտվել, որովհետեւ Ղարաբաղյան հակամարտության կարգավորման գործընթացի համար, բացի բանակցային, խաղաղ հանգուցալուծման տարբերակից, այլ լուծում չկա: