Ոչ ոք իրեն թույլ չի տա ասել, որ Հայաստանում կոռուպցիա չկա

Կառավարությունում այսօր ՀՀ արդարադատության նախարար Հրայր Թովմասյանը, անդրադառնալով նիստի ժամանակ հնչած այն գնահատականին, որը բարձրաձայնեց վարչապետը, կոռուպցիոն ռիսկերի առկայության մասին, նշեց, թե մի բան է, որ դրանք իրականում նվազել են, և բոլորովին այլ բան` դրա ընկալումը հասարակության կողմից:

Նախարարը համոզմունք հայտնեց, թե այն բոլոր բարեփոխումները, որ կատարվել են դատաիրավական համակարգում, չեն կարող չտալ իրենց արդյունքը կոռուպցիոն ռիսկերի նվազման ուղղությամբ` շեշտելով անհրաժեշտ փաստաթղթերի տրամադրման ընթացակարգերը, վարչարարական համակարգերի կատարելագործումը և այլն:

Թովմասյանը նշեց, որ, իր կարծիքով, իրականում կոռուպիցոն ռիսկերը  Հայաստանում նվազել են, «բայց ասել, թե Հայաստանում կոռուպցիա չկա, կներեք, ոչ ոք դա իրեն թույլ տալ չի կարող»: Նախարարը հավաստիացրեց, որ այս ուղղությամբ աշխատանքները շարունակվելու են, և ակնկալիք հայտնեց, որ դրական լուրջ փոփոխությունների արդյունքում հնարավոր կլինի կոռուպցիոն ռիսկերը էականորեն նվազեցնել: