Եվրոպահայերը հիասթափված են. Կիրո Մանոյան

Եվրախորհրդարանի ներկայացուցիչները զարմացած են Մաքսային միությանն անդամակցելու Հայաստանի անակնկալ որոշումից: Այս մասին լրագրողների հետ հանդիպման ժամանակ հայտարարեց  ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը ' անդրադառնալով եվրոպահայերի երրորդ համագումարի ընթացքում բարձրացված հարցերին:

Սակայն, նրա խոսքով, Եվրախորհրդի ներկայացուցիչների դիրքորոշումն էլ հիասթափեցրել է եվրոպահայերին, ովքեր իրենց հերթին դժգոհել են, որ Եվրախուրհուրդն անհրաժեշտ քայլեր չի ձեռնարկել  տարբեր առումներով Հայաստանին աջակցելու համար. օրինակ'  տնտեսական:  
Մանոյանը նաև նշեց, որ Եվրամիության ներկայացուցիչները պատրաստակամություն են հայտնել`  ամրապնդելու եվրոպահայերի հետ ունեցած սերտ հարաբերւթյունները:

Նշենք, որ Եվրոպահայերի 3-րդ համագումարը, որին մասնակցել են ավելի քան 20 երկրների 170 մասնակիցներ,  տեղի է ունեցել հոկտեմբերի 14-15-ին` Բրյուսելում:

Օրակարգում եղել են բազմաթիվ հարցեր, որոնք առնչվում են հայությանը՝ Լեռնային Ղարաբաղի հիմնախնդիր, ջավախահայության իրավունքներ եւ Ցեղասպանության 100-րդ տարելիցին ընդառաջ` նոր մարտավարության մշակում և այլն:

Համագումարին  մասնակցել են նաև ԼՂՀ նախագահ Բակո Սահակյանը, ԱԺ նախագահ Հովիկ Աբրահամյանը, Մեծի Տանն Կիլիկիո կաթողիկոս Արամ Առաջինը: