Հարեւան Իրանում մոլեգնում է խոլերիան

Իրանի Իսլամական Հանրապետությունում խոլերիայի համաճարակ է: Երկրի 10 նահանգում արձանագրվել է խոլերայի 179 դեպք, որից 5-ը` մահվան ելքով։ Հիվանդությունն Իրան է բերվել Աֆղանստանի և Պակիստանի տարբեր վայրերից։ Հիվանդացածներից 149-ը Աֆղանստանի քաղաքացիներ են:

ՀՀ առողջապահության նախարարության կողմից կանխարգելիչ միջոցառումներ են ձեռնարկվում: Խիստ հսկողության տակ են ՀՀ պետական սահմանի Մեղրու և «Զվարթնոց» օդանավակայանի անցման կետերը. տեղեկացնում է ԱՆ մամուլի ծառայությունը:

Արդեն կատարվել է Իրանից Հայաստան ժամանող 910 ուղևորների զննում և ջերմաչափում։ Սննդամթերքի հետ վարակի ներթափանցումը կանխելու նպատակով մաքսային ծառայության և ՀՀ գյուղատնտեսության նախարարության հսկիչ կետերի անձնակազմին հրահանգվել է ուտելիքն առանց փաթեթավորման արգելել հանրապետություն ներկրել, հիվանդության կասկածով անձանց ուղեկցող բեռը, ապրանքը մեկուսացնել և հնարավորության դեպքում ախտահանել:

Ուժեղացվել է հսկողությունը Մեղրու տարածաշրջանի բաց ջրամբարների ջրի նկատմամբ։ Ավելացվել են խոլերայի նկատմամբ հետազոտությունների նմուշառման կետերը և հաճախականությունը: Առողջապահության նախարարությունը տեղեկացնում է՝ Հայաստանում հիվանդության դեպք չի արձանագրվել: