Փոստանջյանի հարցը ընդդիմության ճգնաժամի մասին է վկայում. Աշոտյան

ԱԺ-ում լրագրողների հետ զրույցում ՀՀ ԿԳ նախարար Արմեն Աշոտյանը, անդրադառնալով ԵԽԽՎ-ում ՀՀ նախագահ Սերժ Սարգսյանին Զարուհի Փոստանջյանի ուղղած հարցին, նշեց, որ ԵԽԽՎ-ում շատ ավելի կարևոր բան է տեղի ունեցել, քան Զարուհի Փոստանջյանի հարցը։  Ըստ նախարարի` դա ՀՀ նախագահի ելույթն է, որը հպարտություն առաջացրեց իր մոտ:

Աշոտյանի կարծիքով` Զարուհի Փոստանջյանը փորձում է հավակնել Հերոստրատի դափնիներին` իր անունը դարձնել այսօրվա կամ վաղվա լրահոսի թոփ լուր. «ԶԼՄ-ները միշտ չէ, որ տարբերում են ճանճերը կոտլետներից` լուսաբանելու գործում»:

Աշոտյանը համարում է, որ Փոստանջյանի հարցը վկայում է ընդդիմադիր դաշտի մտքի ճգնաժամի մասին:

Լրագրողների դիտարկմանը, որ Զարուհի Փոստանջյանը նման հարց է տվել, քանի որ նախագահն այնքան էլ հրապարակային չէ ոչ միայն ժողովրդի, այլև պատգամավորների համար, նա պատասխանեց. «Ես շատ ուրախ եմ, որ այսօր ՀՀ-ում, Զարուհի Փոստանաջյանի նման հարցադրումից հետո, կան մարդիկ, որ դեռ պաշտպանում են նրան։ Սա խոսում է այն մասին, որ Հայասատանում բազմակարծություն, ժողովրդավարությունն իր բոլոր այլանդակ դրսևորումներով գոյություն ունի»։