Հոբոյահար Ալեքսեյ Օգրինչուկը ելույթ կունենա Երիտասարդական նվագախմբի հետ

Հոկտեմբերի 5-ին Արամ Խաչատրյանի անվան համերգասրահում Հայաստանի պետական երիտասարդական նվագախմբի հետ (գեղարվեստական ղեկավար եւ գլխավոր դիրիժոր՝ Սերգեյ Սմբատյան) ելույթ կունենա մեծահամբավ հոբոյահար Ալեքսեյ Օգրինչուկը (Ռուսաստան/Ֆրանսիա):

Ծրագրում կհնչեն Ռ. Շտրաուսի եւ Ի. Ստրավինսկու ստեղծագործություններից։ Համերգը կանցկացվի Արամ Խաչատրյանի անվան միջագզային փառատոնի շրջանակներում։

Ալեքսեյ Օգրինչուկը մեր ժամանակների լավագույն հոբոյահարներից է: Գնեսինների անվան երաժշտական ուսումնարանի եւ Փարիզի կոնսերվատորիայի շրջանավարտը (ուսանել է Մորիս Բուրգի, Տիս Ժակի, Ժան-Լուի Կապեզալիի հետ) համատեղում է կատարյալ տեխնիկան վարպետությունն ու քնարականությունը: Նա մի շարք միջազգային մրցույթների մրցանակակիր է, որոնց թվում է Ջենովայի հեղինակավոր «CIEM» միջազգային մրցույթը, որին նա մասնակցեց 19 տարեկանում:

2005-ից Օգրինչուկը Ամստերդամի Կոնցերտգեբաուի թագավորական նվագախմբի մենակատար է: Մինչ այդ նա Ռոտերդամի ֆիլհարմոնիկ նվագախմբի մենակատարն էր` դեռեւս 20 տարեկան հասակում: