Ինչո՞ւ է նախագահը որոշումներ կայացնում անդրկուլիսյան եղանակով. փաստաբան

Այսօր ՀՀ նախագահ Սերժ Սարգսյանի կարգադրությամբ ստեղծվեց նոր' միասնական քննչական մարմին, որի կազմավորման իրավական ապահովման հանձնաժողովի ղեկավար նշանակվեց նախկին գլխավոր դատախազ Աղվան Հովսեփյանը:

Միասնական քննչական մարմինը ստեղծվելու է  Հայաստանի Հանրապետության պաշտպանության նախարարության, Հայաստանի Հանրապետության կառավարությանն առընթեր Հայաստանի Հանրապետության ոստիկանության, Հայաստանի Հանրապետության կառավարությանն առընթեր պետական եկամուտների կոմիտեի կառուցվածքում գործող քննչական մարմինների հենքի վրա:

Թե ինչ նշանակություն կունենա այս նոր կառույցը  քննչական մարմինների անկախությունն ամրապնդելու, քրեական գործերով նախաքննության արդյունավետությունը բարձրացնելու գործում, yerkir.am-ը փորձեց պարզել ՀՀ փաստաբանների պալատի  անդամ, ՓՊ նախագահի նախկին թեկնածու Տիգրան Աթանեսյանից:

- Պարո'ն Աթանեսյան, արդյո՞ք նման մարմին ստեղծելու անհրաժեշտություն կար:

- Միասնական քննչական մարմին ստեղծելու անհրաժեշտությունը դեռևս խորհրդային տարիներից էր զգացվում: Այդ փորձը կիրառվել է  Ռուսաստանում, սակայն` մասնակիորեն:  Բուն գաղափարը շատ լավն է, հարցն այն է, թե ինչպես կկիրառվի այն: Ափսոս, որ վաղուց չի ստեղծվել:  

- Ըստ Ձեզ` նոր համակարգում կբարձրանա քննիչների դերը:

- Քննիչները, իրենց կարգավիճակով լինելով ավելի բարձր, քան հետաքննության մարմինը, նախկինում ենթարկվում էին հետաքննության մարմնին, այսինքն`  ոստիկանության քննիչները ենթարկվում էին ոստիկանապետին: Թեև քննիչն իր կարգավիճակով ավելի բարձր էր, սակայն նրա ենթական էր:  Որքան քիչ վարչական և դատավարական ղեկավար ունենա քննիչը, այնքան մեծ է հավանականությունը, որ նա փորձի իր լիազորություններն իրականացնել ազատորեն:

- Ճի՞շտ էր, արդյոք, Միասնական քննչական մարմնի կազմում  ԱԱԾ քննչականը և Հատուկ քննչական ծառայությունը չներգրավելը:  

- Ճիշտ կլիներ ԱԱԾ-ի քննչականը միացնել, իսկ Հատուկ քննչական ծառայությունն արդեն առանձին կարգավիճակ ունի, և դրա անհրաժեշտությունը չկա:

- Կնպաստի՞, արդյոք, այս կառույցը  մեր երկրում արդարացի նախաքննության իրականացմանը:

- Եթե ձևը և բովանդակությունը նույնն է մնալու,  կադրային փոփոխություններ չեն լինելու, այսինքն` նույն մարդիկ շարունակելու  են նույն մտածելակերպով աշխատել, փոփոխություն չի լինի, կարևորը որակյալ կադրերի ընտրությունն է:

-Իրավական դաշտում տեղի ունեցող կարևորագույն փոփոխություններին Փաստաբանների պալատն ընդհանրապես չի արձագանքում:  Չե՞ք կարծում, որ այս կերպ պալատը հաստատում է իր կախյալ վիճակը:

- Փաստաբանների պալատը իրավական համակարգի կարևորագույն  օղակներից է: Այն  կարող է ազատորեն իր կարծիքը հայտնել իրավական դաշտում տեղի ունեցող կարևորագույն փոփոխությունների վերաբերյալ: Օրինակ` ճիշտ կլիներ` գլխավոր դատախազի նշանակման հարցում որևէ տեսակետ հայտներ:  Ճիշտ է,  պաշտոնապես հայտնի չէ, թե ով է լինելու հաջորդ դատախազը, սակայն  մենք կարող ենք պահանջներ ներկայացնել: Օրինակ` կարող ենք ասել, թե  ինչպիսի անձ ենք ուզում, որ զբաղեցնի այդ պաշտոնը, կամ ինչ է արել նախորդը, որ չպետք է հաջորդն անի և այլն: Գլխավոր դատախազը լուրջ քաղաքականություն է սահմանում իրավական ոլորտում, ինչը մեզ` փաստաբաններիս, կամ մեր վստահորդներին  առնչվում է գրեթե ամեն օր: Ինչո՞ւ  նախագահը,  օրինակ,  4-5 թեկնածու չի առաջարկում և  դնում հանրային քննարկման, ինչո՞ւ է այդ ամենն անում անդրկուլիսյան եղանակներով: Պալատը չպետք է լռի, ստացվում է` պալատն իրենց համար է, ոչ թե ժողովրդի:

Զրուցեց Թագուհի ՄԵԼՔՈՆՅԱՆԸ