Ժամանակն է մտածելու, թե ինչպիսին պետք է լինի տրանսպորտը. Վազգեն Մանուկյան

Հանրային խորհրդի նախագահ Վազգեն Մանուկյանը բաց նամակով պատասխանել է «Վճարում ենք 100 դրամ» քաղաքացիական նախաձեռնության անդամների՝ Մաշտոցի պուրակում քննարկում անցկացնելու առաջարկին` միաժամանակ ընդունելով 20:00-ին Մաշտոցի պուրակ այցելելու հրավերը:

Նախաձեռնության անդամներից մի քանիսը հրավիրվել էին` ուղեվարձի փոփոխության թեմայով այսօր Հանրային խորհրդում նախանշված քննարկմանը մասնակցելու: Երիտասարդները, սակայն, ՀԽ-ի այդ առաջարկին ի պատասխան, առաջարկել էին քննարկումը տեղափոխել Մաշտոցի պուրակ, որպեսզի դրան կարողանան մասնակցել բոլոր ցանկացողները: 

ՀԽ նախագահ Վազգեն Մանուկյանի բաց նամակում մասնավորապես ասված է. «Տրանսպորտի ուղեվարձի թանկացման դեմ պայքարում մեծ է ձեր դերակատարումը՝ հանրության տարբեր շերտերի աջակցությամբ: Այդ պայքարն արդարացված էր, և մենք ողջունում ենք հաղթանակը: Այժմ ժամանակն է մտածելու, թե ինչպիսին պետք է լինի Հայաստանի տրանսպորտը, որպեսզի հասանելի լինի և բավարարի մեր քաղաքացիների պահանջներին: Հանրային խորհուրդն այդ ուղղությամբ շարունակելու է աշխատանքներ իրականացնել՝ հիմնվելով հանրության և մասնագետների կարծիքների վրա»: