ԱՄՆ-ում Ուոթերգեյթի վերաբերյալ փաստաթղթեր են հրապարակվել

Դատարանի որոշման համաձայն` ԱՄՆ պետական արխիվների եւ գրառումների վարչությունը նոր նյութեր է հրապարակել 1972 թվականին «Ուոթերգեյթ» համալիրում Դեմոկրատական կուսակցության գրասենյակի գաղտնալսման վերաբերյալ: Դրանցում հանցագործության 4 կազմակերպիչները` Բեռնարդ Բարքերը, Ֆրենկ Սյուրջիսը, Վիրխիլիո Գոնսալեսը եւ Էուխենիո Մարտինեսը, պատմում են իրենց գործողությունների դրդապատճառների մասին, նաեւ ներկայացվում է նրանց հոգեբանական վիճակի վերլուծությունը. տեղեկացնում է Russia Today-ը:

Ձերբակալված տղամարդկանց վարձել էին, որ ապացուցեն` Ֆիդել Կաստրոյի կառավարությունը ֆինանսավորել է դեմոկրատ Ջորջ Մաքգովերնի նախընտրական ծրագիրը: Այդ նպատակով գաղտնալսվել էր թեկնածուի` վաշինգտոնյան «Ուոթերգեյթ» հյուրանոցային համալիրում գտնվող գրասենյակը: Չորսն էլ դատարանում ասել էին, թե համոզված են եղել, որ «կառավարական արտոնված առաջադրանք» են կատարում` հանուն ազգային անվտանգության:

Գաղտնալսումների գործով սկանդալը պատճառ դարձավ, որ ԱՄՆ պատմության մեջ առաջին եւ դեռեւս միակ անգամ ԱՄՆ նախագահը` Ռիչարդ Նիքսոնը, վաղաժամկետ դադարեցնի իր լիազորությունները:

Գործի վերաբերյալ փաստաթղթերի առաջին գաղտնազերծված փաթեթը հրապարակվել էր 2012-ի նոյեմբերին: