Ռուսաստանի պահվածքը ռազմավարական դաշնակցի պահվածք չէ. Կիրո Մանոյան

ՀՅԴ Բյուրոյի Հայ դատի և քաղաքական հարցերի գրասենյակի ղեկավար Կիրո Մանոյանն այսօր լրագրողների հետ հանդիպման ժամանակ, խոսելով տարածաշրջանային վերջին զարգացումներիի մասին, անդրադարձավ Եգիպտոսում և Սիրիայում ստեղծված իրավիճակին:

Ըստ նրա` Եգիպտոսում տեղի ունեցող իրադարձություններն անկանխատեսելի հետևանքներ կունենան: «Թուրքիան փորձում է կանխել Եգիպտոսում տեղի ունեցած իշխանափոխությունը»,- ասաց նա` հավելելով, որ Թուրքիան  շատ դեպքերում փորձում է դեմ գնալ միջազգային հանրության պահանջին և իր ազդեցությունն ունենալ տարածաշրջանում:

Մանոյանի կարծիքով` տարածաշրջանում տեղի ունեցող իրադարձություններն անպայման իրենց ազդեցությունը կթողնեն հայ համայնքների վրա, սակայն կարևոր է, որ Հայաստանն ունենա այնպիսի ճկուն դիրքորոշում, որ այս կամ այն կողմի հետ չնույնացվի:

Անդրադառնալով Ռուսաստանի կողմից Ադրբեջանին զենք վաճառելուն` Մանոյանն ասաց. «Ճիշտ է, այդ քայլը  հայ-ռուսական ռազմական  պայմանագրի դրույթների խախտում չէ, բայց  ռազմավարական դաշնակցի պահվածք էլ չէ, եթե այդ տրամադրվող զենքը ռազմական  հավասարակշռությունը չի խախտում,  բայց և այնպես մեծացնում է պատերազմի հավանականությունը»:

Ըստ նրա` այդ առնչությամբ հայկական կողմի հրապարակային հակազդեցությունը ևս թույլ էր. «Ռուսաստանը պետք է զգա, որ հայ ժողովուրդը դժգոհ է այդ պահվածքից»: