Այսօր Արամ Խաչատրյանի ծննդյան օրն է

Այսօր մեծանուն կոմպոզիտոր Արամ Խաչատրյանի ծննդյան օրն է: Հենց այսօր էլ կմեկնարկի Արամ Խաչատրյանի անվան 9-րդ միջազգային մրցույթը:

Մրցույթի հանդիսավոր բացումը տեղի կունենա «Արամ Խաչատրյան» համերգասրահում, որի ընթացքում ելույթով հանդես կգան Հայաստանի պետական երիտասարդական նվագախումբը եւ ֆրանսիացի մենակատար, աշխարհահռչակ թավջութակահար Գոտիե Կապյուսոնը:

Արամ Խաչատրյանի անվան միջազգային 9-րդ մրցույթն այս տարի ուղղված կլինի տաղանդավոր թավջութակահարների բացահայտմանը: Մրցույթի առաջին փուլը տեղի կունենա հունիսի 7-9-ը, երկրորդ փուլը՝ հունիսի 10-11-ը, երրորդ փուլը՝ հունիսի 13-ին: Հունիսի 14-ին կկայանա գալա համերգն ու պարգևատրման արարողությունը։