Գյուղացիների դժբախտության պատճառը բանկերն են. Հրաչ Բերբերյան

Հակակարկտային ցանցային համակարգը տեղադրելուց հետո ապահովագրական ընկերություններն ավելի ինտենսիվ կսկսեն գյուղացու հետ աշխատել, հիմա ընդհանրապես չեն աշխատում. լրագրողներին այսօր ասաց Հայաստանի ագրարագյուղացիական միավորման նախագահ Հրաչ Բերբերյանը:

Ըստ բանախոսի` իհարկե, պետք է գնալ ռեֆորմների` հույսը դնելով գյուղացու վրա, եւ պետք է ստեղծել գյուղացիական ապահովագրական համակարգ, որտեղ հենց ֆերմերը կլինի այդ ապահովագրական ընկերության բաժնետեր:

«Ես ասել եմ ու կասեմ, որ մեր երկրի դժբախտության պատճառը բանկերն են: Որ ժողովուրդն այսօր գյուղերը լքում-գնում է, դա բանկերի արածն է, որովհետեւ, մարդկանց 30 տոկոս տոկոսադրույքով վարկեր տալով, գյուղացուն ուղղակի սնանկացրեցին: Տեսե'ք` կառավարությունը փորձում է վարկերի տոկոսադրույքներն իջեցնել, բայց, միեւնույն է, մի մասը այդ ցածր տոկոսներով է վարկ ստանում, բայց մյուս մասն էլի 30 տոկոսով է աշխատում: Գյուղատնտեսությունում, իմ ունեցած տվյալներով, որ միջազգային փորձից է ստացվել, վարկավորումը չպետք է 5 տոկոսից անցնի, որ գյուղացին կարողանա աշխատել ու շահույթ ապահովել»,- նշեց Հրաչ Բերբերյանը:

Բանախոսը կարծիք հայտնեց, որ կարելի է միջազգային փորձն այսօր ներդնել մի մարզում` փորձնական, այնտեղ ընդամենը 1-2 միլիոն դոլարի չափ գումար ներդնելով, ինչպես նաեւ գյուղացիներին որպես բաժնետեր ներգրավելով, այդ մարզում փորձարկումն անել:

«Եվ կարծում եմ, այդ համակարգը կաշխատի, որովհետեւ դա միջազգային փորձն է, որ այդպիսի գործակալություններում հենց գյուղացին ինքն է բաժնետեր եւ ինքն էլ կառավարում է այդ գործակալությունները»,- ասաց ագրարագյուղացիական միավորման նախագահը` հավելելով, որ բանկային համակարգը նույնպես պետք է բերել այն վիճակին, որ գյուղացին ինքը կառավարի, որովհետեւ առեւտային բանկը երբեք գյուղացու համար չի աշխատելու: