40 տոկոս բերքի անկում ունենք, շուկայում արդեն թանկացումներ կան. Հրաչ Բերբերյան

Ծանր տարի ենք ունենալու, քանի որ կարկուտի հետևանքով զգալի վնասներ ենք ունեցել. լրագրողներին հայտնեց «Ագրարագյուղացիական միավորում» ՀԿ-ի նախագահ Հրաչ Բերբերյանը:

Նրա հավաստմամբ` հակակարկտային կայանքներն արդեն վաղուց են ապացուցել իրենց անարդյունավետությունը, և ցանցային համակարգի անցնելու ժամանակն է:

«15 տա՞րի էր պետք` հասկանալու, որ ներկայիս համակարգն ուղղակի էֆեկտիվ չէ: Ո՞վ է այդ սարքերը փորձարկել, ո՞վ է այն արտադրում, պարզ չէ, և ստացվում է` մեկը մտել է կառավարության գրպանը ու հակակարկտային կայանքների համար հսկայական փողեր է տանում: Ամեն տարի էլ կարկուտը խփում է, ամեն տարի վնասներ ենք ունենում, այդ որտե՞ղ և ինչպե՞ս են այդ կայանքներն աշխատում, որ ոչ ոք չի տեսնում»,- ասաց Բերբերյանը:

Նրա խոսքով` պետք է նոր համակարգ ներդնել` կա'մ հրթիռայինը, որի արդյունավետությունը 70 տոկոս է, կա'մ էլ ցանցայինը, ինչի մասին խոսում էր նաև Սերժ Սարգսյանը, և որի արդյունավետությունը 100 տոկոս է:

Խոսելով այս տարվա բերքի անկման մասին` Բերբերյանը նշեց, որ շուրջ 40 տոկոս բերքի անկում ունենք, ինչի հետ կապված էլ թանկացումներ կլինեն: «Շուկայում արդեն իսկ կան թանկացումներ, օրինակ` կարտոֆիլն այս տարի երկու անգամ ավելի թանկ է, քան նախորդ տարի: Ծիրանն ու խաղողն են վատ վիճակում: Կտեսնեք, թե քանի այգի է պակասելու այս տարի, քանի որ գյուղացին դրանց արդյունավետությունը չի տեսնում. նախորդ տարվա խաղողի մթերումից ընկերությունները դեռ պարտքեր ունեն գյուղացուն տալու»,- ասաց նա` հավելելով, թե զարմանալի է` ինչու գյուղնախարարությունը դատի չի տալիս այդ ընկերություններին: «Երբեմն ասում են` իրավասություն չունեն, բայց ոչ թե իրավասության խնդիր է, այլ ցանկության»,- նշեց Բերբերյանը:

Նրա հավաստմամբ` նախորդ տարի գյուղացու ոչ մի խնդիր չի լուծվել, իսկ այս տարի ավելի վատ վիճակ է լինելու` դիզվառելիքի խնդիր ունենք, 5 անգամ պակաս պարարտանյութ է մտել հանրապետություն: