Ընկերության տնօրենն արձագանքել է քաղաքական շահարկումներին

Երեւանի ավագանու նախընտրական պայքարը գնալով թեժանում է: Բանը հասել է նրան, որ ավագանու ընտրությունների մասնակից քաղաքական ուժերի ներկայացուցիչները սկսել են մեղադրանքներ ներկայացնել մեկը մյուսի դեմ:

Մասնավորապես` հաղորդումներից մեկի ժամանակ ավագանու Հանրապետական կուսակցության ցուցակի անդամ Նաիրա Նահապետյանը բազմանշանակ հայտնեց, որ Երեւան քաղաքում տեղադրված գերթանկարժեք նստարանները պատկանում են «Նիկոլ Դուման» ընկերությանը, որի ղեկավարներից մեկը դաշնակցական է: Նահապետյանն ակնարկել էր, թե նստարանները թանկ մատակարարում են, քաղաքապետարանն էլ թանկ գնում է, քանի որ էժան առաջարկներ չկան:

«Ժառանգությունից» Ստեփան Սաֆարյանն էլ, իր հերթին, Facebook-ի իր էջում քննադատել էր քաղաքապետարանին թանկարժեք նստարաններ ձեռք բերելու հարցում` անմասն չմնալով բարձր գնի համար մեղադրել նաեւ Դաշնակցությանը:

Հնչած մեկնաբանությունների պատասխանը «ԵրկիրՄեդիա» հեռուստատեսության եթերում  տվել է  «Նիկոլ Դուման»  արտադրական կոոպերատիպի ղեկավար Կառլեն Գեւորգյանը: