Ադրբեջանի անկախության հռչակագրի հեղինակներից մեկին առեւանգել են ու ծեծել

Ադրբեջանի Հանրային պալատի համակարգող խորհրդի անդամ Իբրահիմ Իբրահիմլիին ապրիլի 6-ին առեւանգել եւ ծեծի են ենթարկել անհայտ անձինք: Դեպքը տեղի է ունեցել Նախիջեւանի Ուզունոբա գյուղի մոտ. տեղեկացնում է Regnum գործակալությունը:

Այսօր Իբրահիմլին լրագրողներին հայտնել է, որ Նախիջեւան էր մեկնել` հարազատներից մեկին հուղարկավորելու: «Սակայն Նախիջեւանի իշխանությունները որեւէ բարոյական արժեք չունեն: Անմիջապես արարողության ժամանակ մի քանի անհայտ անձինք ինձ սկսեցին սպառնալ` պահանջելով հեռանալ: Արարողությունից հետո նստեցի բարեկամիս մեքենան եւ մեկնեցի քաղաք Նախիջեւան: Ճանապարհին մեր մեքենան կանգնեցրեց քաղաքացիական հագուստով մարդկանցով ավտոմեքենա: Նրանք ստիպեցին ինձ դուրս գալ, գլխիս պարկ հագցրին ու ուժով նստեցրին իրենց մեքենան: Ինձ տարան մի ամայի վայր, ներկայացան որպես քրեական տարրեր ու սկսեցին ծեծել: Ընդ որում` նրանք պահանջում էին, որ այլեւս չհամարձակվեմ քննադատել Նախիջեւանի իշխանություններին»,- պատմել է Իբրահիմլին:

Իբրահիմ Իբրահիմլին Միլի մեջլիսի նախկին պատգամավոր է, Ադրբեջանական Հանրապետության անկախության հռչակագրի հեղինակներից մեկը: