Կոստանտին Օրբելյանը հանդես կգա հայաստանյան համերգով

Այս տարի «Երեւանյան հեռանկարներ» միջազգային երաժշտական փառատոնի շրջանակներում Հայաստան է հրավիրվել կոմպոզիտոր Կոստանտին Օրբելյանը. լրագրողների հետ հանդիպման ժամանակ հայտարարեց փառատոնի հիմնադիր Ստեփան Ռոստոմյանը: Նա նշեց, որ առայժմ համերգի հետ կապված մանրամասներ չի կարող հաղորդել, սակայն Օրբելյանի հետ համաձայնության արդեն եկել են:

Ռոստոմյանի հավաստմամբ` փառատոնը նպաստում է նաեւ տուրիզմի զարգացմանը, քանի որ աշխարհի տարբեր մասերից իրենց են դիմում` այս կամ այն համերգին ներկա լինելու համար:

«Այս տարի Հայաստանում համերգով հանդես կգա նաեւ դաշնակահար Ալեքսեյ Լյուբիմովը, ով փառատոնի բացմանն է ելույթ ունեցել ՀՀ-ում: Անցել է շուրջ 13 տարի, եւ այժմ ճիշտ ժամանակն է` նրան կրկին մեր բեմում լսելու»,- ասաց Ռոստոմյանը:

«Երեւանյան հեռանկարներ» փառատոնը 2014-ին տոնելու է իր հիմնադրման 15-ամյակը, որի կապակցությամբ արդեն իսկ բանակցություններ են տարվում Բեռլինի ֆիլհարմոնիկ նվագախմբի հետ` Հայաստանում համերգով հանդես գալու համար:

Ի դեպ, Ցեղասպանության 100-րդ տարելիցին նվիրված միջոցառումների շրջանակներում փառատոնը մի շարք համերգներ է ունենալու աշխարհի տարբեր երկրներում: «Ցեղասպանության դատապարտման եւ ժխտման մասին ոչ թե մենք, այլ դրսի երաժիշտներն են ասելու` իրենց համերգներով»,- ասաց Ռոստոմյանը: