Ելենա Բաշկիրովան համերգով հանդես կգա Հայաստանում

«Երեւանյան հեռանկարներ» փառատոնի շրջանակներում Հայաստանում առաջին անգամ մենահամերգով հանդես կգա անվանի դաշնակահարուհի Ելենա Բաշկիրովան:

Yerkir.am-ի հետ զրույցում փառատոնի մամուլի պատասխանատու Դավիթ Գրիգորյանը տեղեկացրեց, որ համերգը տեղի կունենա փետրվարի 2-ին «Արամ Խաչատրյան» համերգասրահում:

«Բաշկիրովայի հետ Հայաստան կժամանի «Սիմենաուեր Իմպրեսարիատի» հիմնադիր նախագահ Սոնյա Սիմենաուերը, ով Բաշկիրովայի մենեջերն է: Սոնյա Սիմենաուերի հետ «Երեւանյան հեռանկարների» համագործակցությունը 13 տարվա պատմություն ունի. Սիմենաուերի հետ համատեղ ջանքերով Հայաստան են հրավիրվել բազում անվանի երաժիշտներ եւ խմբեր»,- ասաց Գրիգորյանը:

Երեւանյան համերգին կհնչեն Ֆ. Լիստի, Ի. Ալբենիսի, Գ. Ուստվոլսկայայի եւ Պ. Չայկովսկու գործերից:

Ի դեպ, 1998-ին Բաշկիրովան հիմնադրել եւ հանդիսանում է գեղարվեստական ղեկավարը Երուսաղեմի միջազգային կամերային երաժշտական փառատոնի, որը տեղի է ունենում ամեն տարի` սեպտեմբերին, միջազգային ճանաչում ունեցող երաժիշտների մասնակցությամբ։