Բաքվում եւս մեկ քաղաքացիական ակտիվիստ է ձերբակալվել

Այսօր ցերեկը Բաքվում քաղաքացիական հագուստով մարդիկ ձերբակալել են երիտասարդական NİDA շարժման ակտիվիստ Ռաշադ Հասանովին եւ նրան տարել դատախազության` ծանր հանցագործություններ հետաքննող վարչություն. տեղեկացնում է Turan գործակալությունը:

NİDA համակարգող Էլմին Բադալովը գործակալությանը հայտնել է, որ արդեն մեկ ժամից ավելի է` Հասանովը պահանջում է կանչել իր փաստաբանին, սակայն նրա պահանջն անտեսվում է:

Հիշեցնենք, որ մարտի 9-ին ձերբակալվել էին NİDA 3 ակտիվիստներ` Շահին Նովրուզլուն, Բահթիար Ղուլիեւը եւ Մամեդ Ազիզովը: Դատարանը նրանց 3 ամիս կալանավորելու թույլտվություն է տվել` թմրանյութեր եւ պայթուցիկ նյութեր պահելու մեղադրանքով: Նրանց բնակարաններում են դրանք հայտնաբերել, սակայն ձերբակալվածների հարազատները պնդում են, որ այդ ամենն իրենց բնակարաններում թաքցրել են ակտիվիստներին ձերբակալած ազգային անվտանգության նախարարության աշխատակիցները: