Հակաբիոտիկներն ահաբեկչության պես վտանգավոր են

Հակաբիոտիկների միջոցով բակտերիաների դեմ պայքարը պակաս վտանգավոր չէ, քան ահաբեկչությունը. կարծիք է հայտնել Անգլիայի կառավարության բժշկական հարցերով գլխավոր մասնագետ, պրոֆեսոր Սալի Դեյվիսը:

Դեյվիսն ասել է, որ քսան տարի անց  ամենապարզ վիրահատությունն էլ կարող է մահացու վտանգավոր լինել, եթե վարակների դեմ պայքարի միջոցները սպառված լինեն. հաղորդում է BBC-ն:

«Եթե մենք միջոցներ ձեռք չառնենք, ապա պրակտիկորեն հայտնվելու ենք այնպիսի մի իրավիճակում, ինչպիսին ստեղծվել էր 19-րդ դարում, երբ մարդիկ մահանում էին ամենապարզ վիրահատություններից հետո` վարակների պատճառով: Մենք կկորցնենք  օրգանների փոխպատվաստման  և ներկայումս քաղցկեղի բուժման տարբեր միջոցները կիրառելու հնարավորությունը»,- ասել է Դեյվիսը:

Նա նշել է, որ պարզապես անհրաժեշտություն է, որպեսզի դեղագործական ընկերություններն աշխատեն նոր հակաբիոտիկներ ստանալու ուղղությամբ: Սակայն դրանք ստանալու աշխատանքը բոլորովին էլ շահավետ չէ, և 80-ականներից այս կողմ  ոչ մի նոր նախաձեռնություն չի եղել:

Դեյվիսն ասել է նաև, որ պատրաստվում է այս հարցը բարձրացնել ապրիլին Լոնդոնում տեղի ունենալիք ութ գերտերությունների ներկայացուցիչների` G8 գագաթաժողովի ժամանակ: