Հայաստանը լուրջ դեր չի կատարում թմրանյութերի տարանցման ոլորտում. ԱՄՆ պետդեպարտամենտ

Հայաստանը լուրջ դեր չի կատարում թմրանյութերի տարանցման ոլորտում, քանի որ մեկուսացման մեջ է` դեպի ծով ելք չունի, ցամաքային սահմաններից երկուսը` Թուրքիայի եւ Ադրբեջանի հետ, փակ են: Այս ամենը նվազեցնում է Հայաստանի գրավչությունը թմրաբիզնեսի տեսանկյունից. ասվում է ԱՄՆ պետդեպարտամենտի «Թմրանյութերի վերահսկողության միջազգային ռազմավարություն» զեկույցում:

Փաստաթղթում նաեւ նշվում է, որ Հայաստանում արտադրվող թմրանյութերի քանակը մեծ չէ, իսկ օգտագործողների մակարդակը` չափավոր: Ըստ զեկույցի` Հայաստանում ամենաշատ տարածված թմրանյութը մարիխուանան է, եւ անցյալ տարի իրավապահները ոչնչացրել են 82 տոննա մարիխուանա, ընդ որում` ընդգծվում է, որ նշված ժամանակաշրջանում բռնագրավված թմրանյութերի քանակը պակասել է, ինչը իրավապահ մարմինները բացատրում են նրանով, որ 2011-2012 թթ. ոչնչացվել են նարկոթրաֆիկով զբաղվող մի քանի խմբավորումներ: Սակայն ավելացել են Իրանից Հայաստան թմրանյութեր ներմուծելու փորձերը. տեղեկացնում է apsny.ge-ն:

Ըստ զեկույցի` Հայաստանի հարեւան պետությունները` Վրաստանը եւ Ադրբեջանը, ավելի լուրջ մարտահրավերների առջեւ են. դրանք թմրաբիզնեսի հիմնական երթուղիներում են: «Ադրբեջանի տարածքով տարեկան փոխադրվում է 11 տոննա հերոին: Վրաստանը հայտնի է նաեւ իր սեփական թմրանյութերի արտադրությամբ, այդ թվում` ստեղծված ամֆետամինների վրա»,- ասվում է ԱՄՆ պետդեպարտամենտի զեկույցում: