Սփյուռքահայ ուսանողների մեծ մասը Վրաստանից է

«Սփյուռքահայ ուսանողների խորհուրդ (ՈՒՀԿ)»-ի նախագահ Սամվել Մկոյանը այսօր լրագրողների հետ հանդիպման ժամանակ ներկայացրեց Հայաստանում սովորելու ընթացքում սփյուռքահայ ուսանողների մոտ ծագած խնդիրները: Ըստ նրա` ամենակարեւորը ուսման վճարի հարցն է:

«Ի տարբերություն տեղացիների` սփյուռքահայերը 30%-ով ավելի ուսման վարձ են վճարում: Սակայն այս խմբի մեջ չեն մտնում ԼՂՀ-ից եւ Վրաստանի Սամցխե-Ջավախք եւ Քարթլի շրջաններից եկած հայ ուսանողները: Այս որոշումը ընդունվել է 2009-ին, համաձայն որի` նշված տեղամասերից եկած ուսանողները վճարում են այնքան, ինչքան տեղացիները: Ներկայումս քայլեր են ձեռնարկվում տեղացի եւ սփյուռքահայ ուսանողների վարձավճարների չափը հավասարեցնելու ուղղությամբ»,- ասաց Մկոյանը:

Նրա խոսքերով` Հայաստանում կա 4309 սփյուռքահայ ուսանող: Նրանց մեծ մասը Վրաստանից է: Մեծ է նաեւ Ռուսաստանից եւ Սիրիայից եկած ուսանողների թիվը: Ինչ վերաբերում է սիրիահայ ուսանողներին, ապա նրանց խնդիրները հիմնականում բնակության եւ ուսման վճարի հետ են կապված, սակայն նրանց համար սահմանվել են որոշակի առավելություններ: «Ըստ ԿԳՆ-ի հրամանի` սիրիահայ ուսանողների համար բուհ դիմելու կոնկրետ ժամկետներ չկան: Նախապատրաստական փուլում ուսման վճարը 50%-ով կրճատվում է, իսկ բակալավրում նրանք վճարում են այնքան, ինչքան տեղացի ուսանողները, այսինքն` վարձավճարի չափը հավասարվում է»,- ասաց Մկոյանը եւ ավելացրեց, որ Համահայկական երիտասարդական հիմնադրամը մոտ 40 մլն դրամի օգնություն է սահմանել սիրիահայերին` վարձավճարը փակելու համար:

Մկոյանը նաեւ տեղեկացրեց, որ սփյուռքահայ ուսանողները հիմնականում նախընտրում են սովորել Հերացու անվան բժշկական համալսարանում եւ ԵՊՀ-ում: