Ոչ մի գեներալ, ոչ մի մարզպետ չեն կարող ժողովրդի միջից հանել ազատատենչ ոգին

«Էջմիածնի հրապարակն այսօր Էջմիածնին հարիր բազմամարդ չէ. գիտենք ինչու է այդպես, որովհետեւ գիտենք, թե համապատասխան մարդիկ որքան ջանքեր են գործադրել, որ այս հրապարակը բազմամարդ չլինի: Բայց ընտրությունների արդյունքները` որ Րաֆֆի Հովհաննիսյանը ստացել է 57 տոկոս քվե, այսինքն` Էջմիածինը կատարել է իր ընտրությւոնը, եւ եթե այսօր վախեցնում են էջմիածինցիներին, դա նշանակություն չունի»,- այսօր Էջմիածինում հրավիրված հանրահավաքի ժամանակ հայտարարեց «Ժառանգություն» կուսակցության անդամ Անահիտ Բախշյանը:

Նա հիշեցրեց «Չարի վերջը» հեքիաթը, երբ աղվեսը վախեցնում էր, թե կացին կբերի ու ծառը կկտրի, բայց բոլորը գիտեն, որ ո’չ կացին ուներ եւ ո’չ էլ ծառ կարող են կտրել: «Այնպես որ` չվախենաք, դրանք հուսահատ քայլեր են»,- նշեց Բախշյանը:

Նա ասաց նաեւ, թե երբ ժողովուրդը սիրում է երկիրը եւ երբ ցանկանում է ապրել օրինական ու իրավական երկրում, այդ ժողովուրդը ոչնչի առջեւ չի ընկրկում եւ չի վախենում:

Իսկ այդպես մտածող մարդկանց, ըստ Բախշյանի, մնում է ավելի համախմբվել: Նա շեշտեց, որ «ոչ մի գեներալ, ոչ մի մարզպետ եւ այլք չեն կարող ժողովրդի միջից հանել ազատատենչ ոգին»: Այնուհետեւ Բախշյանը էջմածինցիներին համեմատեց Դեմիրճյանի «Հայը» ստեղծագործության հպարտ արծիվների հետ` նշելով. «Պատվով, թասիբով, նամուսով, հպարտ քաղաքացիներ, դուք հաղթեցիք ինքներդ ձեզ եւ ձեր քաղաքում հաղթեցիք: Ու մեզ մնում է ամբողջ երկրում հաղթահարել այն վախը, որը դուք արդեն հաղթահարել եք»: