Ահարոն Ադիբեկյանը մեկփուլանի ընտրություններ է խոստանում

Առաջիկա նախագահական ընտրություններին ընտրողների ակնկալվող մասնակցության վերջին ուսումնասիրության տվյալները «Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանին հիմք են տալիս հայտարարելու, որ ուրվագծվում է  62%-ոց մասնակցություն: Ըստ նրա` ընտրությունները մեկ փուլով են անցնելու:

Այսօր սոցիոլոգը լրագրողներին հայտնեց, որ այն ընտրողների թիվը, ովքեր հաստատ կգնան կամ հնարավոր է, որ մասնակցեն ընտրություններին, կազմում է 58%: Իսկ նրանք, ովքեր ինչ-ինչ պատճառներով չեն ասում կամ չեն ներկայանալու ընտրությանը կազմում են հարցվածների 38%-ը:

Ընտրողների 32%-ը մարդիկ են, ովքեր նախընտրած թեկնածու ունեն: Հարցումներից պարզվում է, որ 14.4%-ը դեռ չի կողմնորոշվել, թե ում օգտին է քվեարկելու` այսպիսով դառնալով ընտրապայքարի կռվախնձոր:

Հարցումներն անցկացվել են Հայաստանի բոլոր մարզերում և Երևանի բոլոր համայնքներում: Սխալվելու հավանականությունը, ըստ սոցիոլոգի, 2-3% է: