Գործարարը երկրորդ հացադիմումն է ներկայացրել ''Ժողովուրդ''-ի դեմ

«X գրուպ» ընկերության սեփականատեր Խաչիկ Խաչատրյանը դատական արշավ է սկսել «Ժողովուրդ» օրաթերթի եւ լրագրող Սոնա Գրիգորյանի դեմ:

Հունվարի 25-ին նրա կողմից Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարան  է ներկայացվել թվով 2-րդ հայցադիմումը: Այս անգամ եւս օլիգարխն իբր իրեն վիրավորելու եւ զրպարտելու համար պահանջում է 3 մլն դրամ (եւս 200 հազար` փաստաբանների աշխատանքի համար):

Փաստորեն, Խաչիկ Խաչատրյանը ընդհանուր հաշվով «Ժողովուրդ» օրաթերթից պահանջում է 6 մլն 200 հազար դրամ: Հիշեցնենք, որ խոսքն այն օլիգարխի մասին է, որն իրեն անցանկալի հարց տալու համար «Ժողովուրդ»-ի թղթակցին անվանել էր «պրաստիտուտկա»` պահանջելով դա եւս հրապարակել: Արդյունքում «Ժողովուրդ» օրաթերթը Խաչատրյանի հրապարակային ներողությանը կես ամիս սպասելուց հետո դեկտեմբերի 28-ին հայց ներկայացրեց` գործարարից պահանջելով ներողություն խնդրել: Եւ ահա, «Ժողովուրդի» հայցադիմումից 12 օր անց  միայն հասկանալով, որ ինքը եւս վիրավորվել է, օլիգարխն  իր հերթին միանգամից 2 հայց է ներկայացրե` ներողությունից խուսափելու համար:

«Ժողովուրդ» օրաթերթը հայտնում է, որ մինչեւ վերջ կպայքարի իր արժանապատվությունը արդեն 6 մլն դրամ գնահատող Խաչիկ Խաչատրյանի  «դիմակը պատռելու» համար:  Օրաթերթը կշարունակի տպագրվել անխափան` հաղթահարելով բոլոր խոչընդոտները: