ԵԽԽՎ-ն կքննարկի Ադրբեջանում քաղբանտարկյալների հարցը

Այսօր Ստրասբուրգում մեկնարկում է ԵԽԽՎ ձմեռային նստաշրջանը: Օրակարգում Կոսովոյում տիրող իրադրությունն է, Ադրբեջանի կողմից ստանձնված պարտավորությունների կատարման մոնիտորինգը, նաեւ ռուս-վրացական հարցի հումանիտար բաղադրիչը:

Առաջին իսկ օրը ելույթով հանդես կգա  Վրաստանի նախագահ Միխեիլ Սահակաշվիլին: Այնուհետեւ բանավեճ կլինի, որի ընթացքում ռուսական պատվիրակությունը սուր հարցեր է բարձրացնելու, մասնավորապես` Վրաստանում մարդու իրավունքների ոտնահարման հարցը. տեղեկացնում է ИТАР-ТАСС-ը:

Ադրբեջանի ստանձնած պարտավորությունների կատարման վերաբերյալ զեկույցին զուգահեռ ներկայացվելու է առանձին բանաձեւ այդ երկրում քաղբանտարկյալների մասին: Վերջինիս կապակցությամբ Բաքուն արդեն իր բողոքն է հայտնել` ընդգծելով, որ նման քննարկում ԵԽԽՎ-ում անցկացնելու որեւէ հիմք չկա:

ԵԽԽՎ-ն կքննարկի նաեւ Եվրոպայում ԶԼՄ-ների ազատության հարցը, մարդու օրգանների վաճառքի դեմ պայքարի ԵԽ կոնվենցիա մշակելու մասին բանաձեւը:

ԵԽԽՎ ձմեռային նստաշրջանը կտեւի մինչեւ հունվարի 25-ը: