Կոչ են անում երկարացնել Ադրբեջանում քաղբանտարկյալների հարցով զեկուցողի մանդատը

Ադրբեջանի քաղաքացիական հասարակության մի խումբ ակտիվիստներ, քաղաքական գործիչներ, նախկին քաղբանտարկյալներ դիմել են ԵԽԽՎ նախագահ Ժան-Կլոդ Մինյոնին` կոչ անելով երկարացնել Ադրբեջանում քաղբանտարկյալների հարցով զեկուցողի մանդատը. տեղեկացնում է Turan գործակալությունը:

Ուղերձում նշվում է, որ հունվարի 23-ին «Ադրբեջանի իշխանությունների կասկածելի լոբբիստական գործունեության արդյունքում» մերժվեց Ադրբեջանում քաղբանտարկյալների մասին բանաձեւի նախագիծը, քանի որ դեմ քվեարկեցին ԵԽԽՎ 125 անդամներ: Անհանգստացնող է նաեւ այն, որ  բանաձեւի նախագծին դեմ քվեարկողներից էին ԵԽԽՎ Մոնիտորինգային հանձնաժողովի` Ադրբեջանի հարցով համազեկուցողներ Պեդրո Արգամունտը եւ Ջոզեֆ Գրեխը, որոնց վերջին 2 տարիների ընթացքում ներկայացվել են Ադրբեջանում քաղբանտարկյալների եւ հետապնդումների մասին նյութեր, սակայն նրանք դրանք չեն հետաքննել:

Ուղերձի հեղինակներն անարդարզցի են համարում նաեւ Ադրբեջանում քաղբանտարկյալների հարցով զեկուցող Քրիստոֆ Շտրասերի զեկույցի մերժումը, քանի որ դա աջակցությունից զրկում է այն մարդկանց, ովքեր տառապում են բռնություններից:

«Դա նվազեցնում է Ադրբեջանի քաղաքացիների վստահությունը ԵԽԽՎ-ի նկատմամբ: Բացի դրանից` ԵԽԽՎ-ի նման մոտեցումը խթանում է իշխանությունների կողմից նոր քաղաքական բռնություններ եւ քաղբանտարկյալների թվի աճ վերջին երկու ամիսներին»,- ասվում է փաստաթղթում:

Նամակի հեղինակները խնդրում են երկարացնել Ադրբեջանում քաղբանտարկյալների հարցով զեկուցողի մանդատը,  փոխել Մոնիտորինգային հանձնաժողովի համազեկուցողներին, նաեւ 2013-ի հոկտեմբերի 16-ին Ադրբեջանում կայանալիք նախագահական ընտրություններին, որպես դիտորդ, չուղարկել այն պատգամավորների, ովքեր դեմ էին քվեարկել քաղբանտարկյալների մասին բանաձեւին:

Նամակի պատճենն ուղարկվել է նաեւ Քրստոֆեր Շտրասերին, ԵԽ նախագահ Թորբյորն Յագլանդին, ԵԽ նախարարների հանձնաժողովի ղեկավար Հիլբերտ Սունիեին, ԵԽ մարդու իրավունքների հանձնակատար Նիլս Մուժնիեկսին, ԵԽԽՎ անդամների: