Համաշխարհային փորձագետներն ու Րաֆֆիի ''օրիգինալ մտքերը''

ԱԺ ՀՀԿ խմբակցության պատգամավոր Համլետ Հարությունյանը վստահ է, որ նախագահական այս ընտրությունները լինելու են արդար եւ թափանցիկ, մասնակցությունն էլ` ինչպես միշտ, «նորմայի մեջ»: Այս մասին ՀՀԿ-ական պատգամավորը հայտնեց Yerkir.am-ի հետ զրույցում:

Նա թեեւ խոստովանում է, որ իշխանություններից հիասթափված մարդիկ էլ կան, բայց, մյուս կողմից, շտապում է վստահեցնել, որ այնքան չեն, որ խանգարեն նախագահական ընտրություններին: «Ո՞ր իշխանություններից դժգոհներ չեն լինում, իհարկե, կան»,-նշեց պատգամավորը:

Սերժ Սարգսյանի լուրջ մրցակիցներն են, ըստ Հարությունյանի, հավասարապես ե'ւ Հրանտ Բագրատյանը, ե'ւ Րաֆֆի Հովհաննիսյանը: Էպոսագետին ՀՀԿ-ական պատգամավորը չի ճանաչում, ուստի չի կարող ասել` լուրջ մրցակի՞ց է, թե՞ ոչ:

Թեեւ Բագրատյանին եւ Հովհաննիսյանին ՀՀԿ-ական պատգամավորը լուրջ մրցակից է համարում, բայց միաժամանակ հիշեցնում է, որ պայքարը գնալու է երկրորդ տեղի համար, քանի որ գործող նախագահի հաղթանակը միանշանակ է: «Իհարկե, պայքարը գնալու է երկրորդ տեղի համար, քանի որ չեմ էլ կասկածում, որ նախագահը հաղթելու է առաջին իսկ փուլում»,- նշեց նա եւ հորդորեց, անկախ ամեն ինչից, մրցակիցներին լուրջ ընդունել:

«Անգամ էպոսագետի՞ն»,- հետաքրքրվեցինք: Ի պատասխան` Հարությունյանը հայտարարեց, որ էպոսագետն իր համար անհայտ անձնավորություն է եւ չի հասկանում, թե ինչու է առաջադրվել, թեեւ իրավունք ունի: ՀՀԿ-ական պատգամավորը չի ընդունում, որ, ժողովրդական լեզվով ասած, ով տեղից վեր է կենում, նախագահ է ցանկանում դառնալ: «Փորձում են նախագահի ինստիտուտը վարկաբեկել: Մարդիկ, ովքեր քաղաքական ճանապարհ չեն անցել, չունեն կուսակցական պաշտպանվածություն, քաղաքականության մեջ նորեկ են, չպետք է նախագահի թեկնածու առաջադրվեն»,- հայտարարեց պատգամավորը:

Անդրադառնալով Րաֆֆի Հովհաննիսյանի հայտարարությանը, որ հնարավոր է` ընտրությունները երկու փուլով անցնեն, եւ որ այս ընտրություններում գնալու է երկու Հայաստանների` Սերժի եւ Րաֆֆի Հայաստանների պայքար, ՀՀԿ-ական պատգամավորը նշեց, որ «Րաֆֆին միշտ էլ օրիգինալ հայտարարություններ է անում»: «Ես մի վայրկյան անգամ չեմ կասկածում, որ գործող նախագահը առաջին փուլով հաղթելու է: Դրանում համոզված են համաշխարհային փորձագետները, սոցիոլոգները...»,- հայտարարեց Հա,լետ Հարությունյանը: