Րաֆֆիի հացադուլը ոչ ոքի դեմ ուղղված չէ

Րաֆֆի Հովհաննիսյանն ունի իր բնավորությունը, ունի կյանքի, պայքարի իր եղանակները եւ այդ պայքարը տանում է ամենատարբեր միջոցներով` նաեւ իրեն զրկելով որոշ բարիքներից, այդ թվում` հացից. լրագրողներին այսօր ասաց Րաֆֆի Հովհաննիսյանը:

Նախագահի նախկին թեկնածուն նշեց, որ, դրանով հանդերձ, ունի նաեւ շիտակություն, որ իր խոսքը չի փոխում` ո’չ Մոսկվայում, ո’չ Բաքվում, ո’չ Վաշինգտոնում եւ ո’չ այլուր:

«Բայց նաեւ ունեմ ներքին պահանջ` իմ կյանքն իմաստավորելու, որ այս անգամ կարող եմ դիմել հացադուլի եւ հավատացած եմ, որ հնարավոր բոլոր ճանապարհներով պետք է տանեմ պայքարը մինչեւ վերջ»,- ասաց Րաֆֆի Հովհաննիսյանը:

Նա հիշեցրեց, որ իր հացադուլը ոչ թե ուղղված է Սերժ Սարգսյանի, իշխանությունների կամ որեւէ մեկի դեմ, այլ համաժողովրդական պայքարի ավարտական փուլին մաս կազմելու իր հավատամքն է:

«Սա հացադուլ չէ, այլ պայքար է, որն ուղղորդվում է հաց չուտելով»,- պարզաբանեց Րաֆֆի Հովհաննիսյանը: