Րաֆֆիի վրանը հանել են ոստիկանապետի հրամանով, այլ ոչ թե օրենքով

«Րաֆֆի Հովհաննիսյանից հետո մի կին տան հարց ուներ, եկավ բենզինի շիշը ձեռքը, մյուս ձեռքին էլ` մի հատ զոնտիկ, ասեց, թե էստեղ եմ մնում...»,- այսօր լրագրողների հետ հանդիպման ժամանակ ասաց ոստիկանության Երեւան քաղաքի վարչության պետ Ներսես Նազարյանը:

Եվ որպեսզի հացադուլավորների եւ բողոքավորների թիվը չշատանա, եւ մարդիկ էլ վրաններ չկապեն Ազատության հրապարակում, որոշվել է արգելել նաեւ Րաֆֆի Հովհաննիսյանի համար վրան տեղադրել:

Հարցին, թե ի՞նչ օրինական հիմքով են ոստիկանները պատառոտել Րաֆֆի Հովհաննիսյանի համար Ազատության հրապարակում տեղադրված վրանը, ոստիկանապետը պատասխանեց. «Նախ ասեմ, որ դա պատառոտել չէր: Փորձել են հանել, դիմադրել են: Շատ հանգիստ է անցել: Հանել են դրել մի կողմ, իրենք էլ գնացել, տեր են եղել իրենց վրանին»:

Իսկ դրանից առաջ վրանը հանելու հրահանգը օրենսդրական ոչ մի հիմք էլ չունի. «Օրենսդրական հիմքը չեմ նայել, առանց դրա էլ մենք թույլ չենք տալիս դա անել: Իմ հրահանգով թույլ չեմ տվել, որպեսզի դա չդառնա նախադեպ մյուսների համար»:

Ն. Նազարյանը խուսափեց մեկնաբանել ՀՀ ոստիկանապետ Ալիկ Սարգսյանի` վերջերս արած այն արտահայտությունը, թե «պատմությունը ցույց է տվել, թե ինչեր են լինում այդ վրանների պատերի ներսում»: Սակայն ասաց, թե, օրինակ, մարտի 1-ի դեպքերից առաջ վրաններում զինամթերք է եղել:

Իսկ հարցին, թե, արդյո՞ք վրաններ տեղադրելն արգելելով, ոստիկանությունը փորձում է կանխել հերթական մարտի 1-ը, ոստիկանապետը պատասխանեց. «Մարտի 1-ը մոռացեք, նման բան չի լինելու»։