Տեխասյան պատանին, օրիգինալ էպոսագետն ու անհասկանալի Բագրատյանը

Վերլուծաբան, քաղաքական տեխնոլոգ Իգոր Մուրադյանը լրագրողների հետ հանդիպման ժամանակ կիսեց նախագահ Սերժ Սարգսյանի այն տեսակետը, որ ընտրությունները մրցակցային են: Ըստ նրա` ընտրությունների շեմին Րաֆֆի Հովհաննիսյանի ընտրազանգվածը կմեծանա, և նա լուրջ հակառակորդ կլինի գործող նախագահի համար:

Անդրադառնալով նախագահի թեկնածու Անդրիաս Ղուկասյանի հացադուլին` վերլուծաբանը նշեց, որ դա տղամարդկային քայլ չէ, ինչ-որ իրավունքների համար պայքարող չպետք է ֆիզիկական ուժը կորցնի: Ինքն անգամ իր պաշտպանությունն է առաջարկել Ղուկասյանին այն դեպքում, եթե նա դադարեցնի հացադուլը, սակայն թեկնածուն չի համաձայնել` ասելով, որ դա կարևոր պահ է իր քաղաքական կյանքում:

Yerkir.am-ի հարցին` արդյոք  ծանո՞թ է նախագահի թեկնածուների նախընտրական ծրագրերին, Մուրադյանը պատասխանեց, որ չի կարծում, որ կգտնվի նորմալ մեկը, ով կարդում է նրանց ծրագրերը, նաեւ հավելեց, որ ինքը չի կարդացել և ուշադիր չի հետևում նրանց ելույթներին:

Քաղաքագետը թեկնածուներից ամենաօրիգինալը համարում է էպոսագետին, չի կարծում, որ նրա նմանը երբևէ կհայտվի քաղաքական դաշտում: «Ես հիանում եմ նրա համարձակությամբ, սկզբունքայնությամբ, ավելի օրիգինալ թեկնածու ես չգիտեմ»,- նշեց նա:

Րաֆֆի Հովհաննիսյանի վարկանիշը բանախոսը նմանեցրեց  տեխասյան պատանու իմիջի հետ, ով աչքի է ընկնում իր ջինսերով և բլուզներով. «Վատ չէ, շատ հարմար, աշխատանքային հագուստ է: Նա բարևում է մսավաճառներին,  խորովածանոցներում ու վարսավիրանոցներում է լինում»:

Իսկ Բագրատյանի մասին քաղտեխնոլոգն ասաց. «Հրանտ Բագրատյանը անհեթեթություններ է ասում իր քարոզարշավի ընթացքում: Ես չգիտեմ, թե ում համար է նա աշխատում: Նրան ոչ ոք չի հասկանում` ո՛չ տնտեսագետները, ո'չ սովորական մարդիկ»: