Դպրոցները բթացնում են աշակերտներին

Դպրոցներում աշակերտներին բթացնում են, այլ ոչ թե սովորեցնում. գրում է «Ժողովուրդը»: Երևանի մի շարք դպրոցների, մասնավորապես` թիվ 114, Ա. Պուշկինի անվան թիվ 8, Չեխովի անվան թիվ 55 դպրոցներում ուսուցիչները երեխաներին հանձնարարում են տնային աշխատանք` միաժամանակ տրամադրելով էլեկտրոնային այս կայքերի հասցեները`www.g-gollege.com,www.sovorel.am,www.homework.am:

Այստեղ էլ տեղադրված են տնային աշխատանքները` պատրաստի, լուծված վիճակում: Այսինքն` երեխաները, օգտվելով կայքից, առանց երկար-բարակ մտածելու արտագրում են առաջադրանքները և ներկայանում դասի: Ավելին, www.sovorel.am եւ www.homework.am կայքերն առաջադրանքի լուծման համար sms սակագներ են սահմանել, և ուսուցիչներին այս մոտեցումը ձեռնտու է այնքանով, որ ստուգողների մոտ խայտառակ չեն լինի:

ԿԳՆ հանրակրթության վարչության պետ Նարինե Հովհաննիսյանը «Ժողովուրդ»-ի հետ զրույցում նշել է, թե հարցը կուսումնասիրեն և կհասկանան, թե իրականում ինչ է կատարվում:

Փաստորեն, նշում է թերթը, մինչև հիմա ՀՀ կրթության և գիտության նախարարությունը տեղյակ չէ, որ հայ աշակերտներին բթացնելու գործընթաց է ծավալվում: Վերջում թերթը հույս է հայտնում, որ նախարար Արմեն Աշոտյանը նախընտրական քարոզչության «ընդմիջումներին» կզբաղվի կարևորագույն այս խնդրով: