168 ԺԱՄ. ՕԵԿ-ից քցվածները

Թերթի տեղեկություններով` «Օրինաց երկիր» կուսակցությունում լուրջ խուճապ է սկսվել։ Բանն այն է, որ ՀՀ նախագահ Սերժ Սարգսյանը կոալիցիայի անդամ կուսակցությունների ղեկավարների հետ հանդիպման ժամանակ զգուշացրել է, որ նախընտրական ցուցակները կազմելիս պետք է հաշվի առնեն, որ դրանցում չպետք է հայտնվեն գործարարների անուններ:

Թերթի աղբյուրների փոխանցմամբ՝ դրանից հետո Ա.Բաղդասարյանը հայտնվել է անելանելի վիճակում, քանի որ նա վաղուց Էդուարդ Մադաթյանին (Խուճուճ Էդո) և Արայիկ Հայրապետյանին (Լավանդայի Արայիկ) խոստացել էր ընդգրկել ՕԵԿ համամասնական ցուցակում, ինչի դիմաց Էդ.Մադաթյանն ու Ա.Հայրապետյանը կուսակցությանը պետք է ֆինանսական աջակցություն ցուցաբերեին նախընտրական փուլում։

Ըստ նույն աղբյուրների` վերջիններս արդեն իսկ որոշակի գումարներ տրամադրել են ՕԵԿ-ին՝ տարբեր վարչական շրջաններում ՕԵԿ շքեղ գրասենյակներ բացելով։ Ըստ այդ տեղեկությունների՝ նրանք Ա. Բաղդասարյանին ասել են, որ այլևս չեն պատրաստվում ֆինանսական աջակցություն ցուցաբերել ՕԵԿ-ին, ինչը Ա. Բաղդասարյանին շատ անհարմար վիճակի մեջ է դրել։