ՀՀ իշխանությունները պետք է դադարեցնեն լրագրող Դավիթ Սարգսյանի ու «168 Ժամ»-ի գույքի նկատմամբ արգելանքները․ CPJ՝ Լրագրողների պաշտպանության կոմիտե

«Հայաստանի մայրաքաղաք Երևանի դատարանը պետք է ապասառեցնի լրագրող Դավիթ Սարգսյանի հաշվեհամարների և «168 Ժամ» անկախ լրատվականի գույքի վրա դրված արգելանքները, իսկ երկրի իշխանությունները պետք է ապահովեն, որ մամուլի ներկայացուցիչներն իրենց աշխատանքի համար իրավական հաշվեհարդարի չենթարկվեն»,- այս մասին հայտարարել է «Լրագրողների պաշտպանության կոմիտե» (CPJ – Committee to Protect Journalists) միջազգային կազմակերպությունը։

Հայտարարությունում նշվում է, որ ըստ լուրերի և Սարգսյանի փաստաբան Արամ Օրբելյանի, ով զրուցել է CPJ-ի հետ, մայիսի 2-ին Երևան քաղաքի ընդհանուր իրավասության քաղաքացիական դատարանը որոշում էր կայացրել սառեցնել Սարգսյանի  գույքից 9 մլն դրամ (23 հազար ԱՄՆ դոլար), ինչպես նաև գործատուից՝ «168 Ժամ»-ից,  9 մլն դրամ։

Մայիսի 16-ին Ավինյանի փաստաբանը Ֆեյսբուք սոցիալական ցանցում հայտարարել էր, որ դիմել է դատարան՝ Սարգսյանի ակտիվների վրա դրված արգելանքը վերացնելու համար, ասելով, որ իր պաշտպանյալը «ոչ մի լրատվամիջոցի սնանկացնելու կամ նրան ֆինանսական անհարմարություններ պատճառելու մտադրություն չունի»։

Օրբելյանը CPJ-ին երկուշաբթի օրը՝ մայիսի 22-ին, ասել է, որ դատարանի ներկայացուցիչը հաստատել է Ավինյանի՝ սառեցումը դադարեցնելու դիմումը ստանալու փաստը,  սակայն իշխանությունները դեռևս պետք է համապատասխան քայլեր ձեռնարկեն դրա վերաբերյալ։ CPJ-ն զանգահարել է ընդհանուր իրավասության դատարան՝ մեկնաբանությունների համար, սակայն ոչ ոք չի պատասխանել:

«Հայ լրագրող Դավիթ Սարգսյանի և «168 Ժամ» թերթի նկատմամբ կիրառված ունեցվածքի սառեցումները մտահոգիչ զարգացում են, որոնք կարող են բացասական ազդեցություն ունենալ   երկրի լրատվամիջոցների վրա»,- այս մասին  Նյու Յորքում ասել է  CPJ-ի Եվրոպայի և Կենտրոնական Ասիայի ծրագրերի համակարգող Գյուլնոզա Սաիդը՝ հավելելով, որ իշխանությունները պետք է դադարեցնեն այս սառեցումները և ապահովեն, որպեսզի լրատվամիջոցների դեմ քաղաքացիական հայցերը  չհանգեցնեն անկախ լրատվամիջոցների սնանկացման վտանգի:

Զուգահեռաբար՝ CPJ-ն նշել է, որ «168 Ժամ»-ը հաճախ է քննադատում Հայաստանի կառավարությանը:

«Փետրվարին «Տիգրան Ավինյան՝ նորահայտ մեծահարուստը» տեսանյութում  Սարգսյանը պնդում է, որ Ավինյանի ընտանիքն «անշեղորեն հարստանում է» քաղաքական ազդեցության շնորհիվ՝ 2018 թվականին Նիկոլ Փաշինյանի իշխանության գալուց հետո։ Օրբելյանը CPJ-ին ասել է, որ Ավինյանը չի վիճարկել Սարգսյանի  նյութում բերված փաստերը, սակայն հերքել է, որ դրանք կոռուպցիա են։ CPJ-ն մեկնաբանություն ստանալու համար նամակ է ուղարկել Ավինյանին, սակայն ոչ մի պատասխան չի ստացել»,- ասված է CPJ-ի հայտարարության մեջ։

Խոսքի ազատության պաշտպանության կոմիտեի նախագահ Աշոտ Մելիքյանը CPJ-ին ասել է, որ այս դեպքն առաջինն է, երբ լրատվամիջոցին առավելագույնը 9 մլն դրամի չափով դատի են տվել այն բանից հետո, երբ Հայաստանը 2021 թվականին եռապատկեց վիրավորանքի և զրպարտության համար առավելագույն տուգանքները: «168 Ժամ»-ի փաստաբան Արամազդ Կիվիրյանն էլ CPJ-ին ասել է, որ Հայաստանում վիրավորանքի և զրպարտության հայցերը հիմնականում տատանվում են 100,000-ից 500,000 դրամի սահմաններում (258-1292 ԱՄՆ դոլար), և թեև դատարանները երբեմն սառեցնում են լրատվամիջոցների շատ ավելի փոքր ակտիվները, դրանք սովորաբար վերաբերում են լրատվամիջոցների ավելի փոքր ակտիվներին:

«Ներկայիս սառեցումն էական խնդիր է ստեղծում «168 Ժամ»-ի  գործունեության համար»,- ասել է փաստաբանը։

Կիվիրյանը CPJ-ին նաև ասել է, որ  «168 Ժամ»-ը կդիմի սառեցումը վերացնելու համար, և եթե չհաջողվի, այն կմնա մինչև դատարանի վերջնական որոշումը հայցի վերաբերյալ, որը կարող է տևել տարիներ:

CPJ-ը հիշեցրել է, որ Դավիթ Սարգսյանն  իր ֆեյսբուքյան էջում գրել էր, որ իր հաղորդման համար հիմնվել էր նախկինում հրապարակված նյութերի վրա, որոնք Ավինյանն այն ժամանակ չէր հերքել։

«Նա գրել էր, որ կարծում է, թե հայցը նպատակ ունի «իրեն զգալի ֆինանսական վնաս պատճառել և այդպիսով իրեն լռեցնել»»,- գրել էր CPJ-ն։