Իրենք իրենց տաշտակը. Վահան Հովհաննիսյան

Ընկալել է այն, ինչ ասված էր. լրագրողների հետ հանդիպման ժամանակ անդրադառնալով վարչապետի այն հայտարարությանը, թե ով մեզ հետ չհամագործակցի, կհայտնվի կոտրած տաշտակի առջեւ` նշեց ԱԺ ՀՅԴ խմբակցության ղեկավար Վահան Հովհաննեսյանը:

Դաշնակցական գործիչը նշեց, որ առաջին անգամը չէ, երբ Հանրապետականի բարձրաստիճան պաշտոնյաների հայտարարություններից հետո հերքելու կամ բացատրելու անհրաժեշտություն է առաջանում: Նման պահվածքը, ըստ Հովհաննեսյանի, կարող է երկու բան նշանակել. կա'մ ասում են այն, ինչ մտածում են եւ հատուկ սկանդալի բնույթ են տալիս, կա'մ էլ անզգույշ են:

Տաշտակի գաղափարախոսությունը մի կողմ թողնելով` Հովհաննեսյանը նշեց, որ «տաշտակը, թող իրենց մնա» եւ հավելեց, որ համագործակցության անվան տակ Հանրապետականը հասկանում է հլու-հնազանդ լինելը:

«Թույլ չենք տա, որ որեւէ մեկն այս երկրում, սխալներ թույլ տալով հանդերձ, հեզասահ իշխի»,- նշեց նա եւ վստահեցրեց, որ եթե ՀՀԿ-ն, իրոք, համագործակցելու ցանկություն ունենար, կհամագործակցեր Ադրբեջանի ՄԱԿ-ի Անվտանգության խորհրդի ոչ մշտական անդամ չդառնալու դեմ:

«Վարչապետի համագործակցություն ասածը ենթարկվել է նշանակում»,- ասաց Վ. Հովհաննեսյանը եւ խորհուրդ տվեց, որ դա իրենց կոալիցիայի մեջ քննարկեն, իսկ թե որքան կհաջողվի` դեռ կտեսնենք:

Անդրադառնալով կոալիցիոն հուշագրին` դաշնակցական պատգամավորը նշեց, որ երբ նշվում է, որ կուսակցությունները չեն պայքարելու, նշանակում է, որ կոալիցիայի մյուս ուժերին պարտավորեցրել են ընդունել ՀՀԿ-ի դերը: Նման պահվածքն, ըստ Հովհաննեսյանի, ընդունելի չէ, ոչ միայն ՀՅԴ-ի, այնպես էլ հասարակության համար:

Նա վստահեցրեց, որ «հասարակության ակտիվությունը պետք է կոտրի ոմանց տաշտակը, որ հասկանան, թե ինչ լուրջ սխալ են թույլ տվել»: