Մոլդովան Հայաստանին 3 մլն դոլարի զենք է վաճառել

Լեհաստանում անցկացված Արեւելյան գործընկերության գագաթաժողովի շրջանակներում Ադրբեջանի նախագահ Իլհամ Ալիեւի հետ հանդիպման ժամանակ Մոլդովայի վարչապետ Վլադ Ֆիլատը ներողություն է խնդրել Հայաստանին զենք վաճառելու համար: Ըստ 1news.az-ի` այդ մասին այսօր լրագրողներին հայտնել է Ադրբեջանում Մոլդովայի դեսպան Իգոր Բոդյուն:

Նա հայտարարել է, որ Մոլդովան Հայաստանին իսկապես 3 մլն դոլարի զենք է վաճառել, եւ այդ փաստը որակել է որպես սխալ քաղաքական քայլ: «Թեեւ, իհարկե, Հայաստանի նկատմամբ զենքի վաճառքն արգելող որեւէ միջազգային պատժամիջոց չի գործում»,- հավելել է դեսպանը:

Նա նշել է, որ Ադրբեջանն ու Մոլդովան ՎՈՒԱՄ անդամներ են, եւ հուսով է, որ այդ փաստը բացասաբար չի ազդի երկրների հարաբերությունների վրա: «Մոլդովայում արդեն ստեղծվել է երկու հանձնաժողով`` խորհրդարանական եւ Անվտանգության խորհրդի, որոնք զբաղվում են այդ միջադեպի հետաքննությամբ»,- ասել է Բոդյուն: