Ստամբուլում տաքսու վարորդը հարձակվել է հայուհու վրա

Անցած շաբաթ Ստամբուլում տաքսու վարորդը հարձակվել է հայուհի ուղեւորուհու վրա, բռունցքներով հարվածել նրան ու հայհոյել. տեղեկացնում է armtoday.info-ն` վկայակոչելով Ստամբուլում լույս տեսնող «Մարմարա» օրաթերթը:

«Ձեր խոսելաձեւից երեւում է, որ թուրք չեք: Հայուհի՞ եք, թե՞ հրեուհի»,- հարցրել է վարորդը: Լսելով, որ կինը հայ է, նա կանգնեցրել է մեքենան ու սկսել հայհոյել, ապա, դրանով չբավարարվելով, բռունքներով հարվածել կնոջ դեմքին եւ դուրս շպրտել նրան մեքենայից:

Ըստ թերթի` փողոցով անցնող մի փաստաբան, տեսնելով կնոջ արյունաշաղախ դեմքը, լուսանկարել է ավոտմեքենայի համարները: Կինը դիմել է ոստիկանություն, որը հայտնաբերել է մեքենայի տիրոջը եւ փոխարինող վարորդին, սակայն հարձակվողին չի հաջողվել գտնել: Որոշ տվյալներով` նա հոգեկան հիվանդ է: