Տեր-Պետրոսյանի առողջական վիճակը վատացե՞լ է

Լուրեր էին տարածվել, թե Լեւոն Տեր-Պետրոսյանի առողջական վիճակը լավ չէ, եւ այսօրվա հանրահավաքը տեղի չի ունենալու: Ճշգրիտ տեղեկություն ստանալու ակնկալիքով yerkir.am-ի թղթակիցը զանգահարեց ՀՀՇ վարչության նախագահ Արամ Մանուկյանին:

«Լեւոն Տեր-Պետրոսյանի առողջական վիճակը նորմալ է»,- ասաց  նա եւ հավելեց, որ այս պահին երկրի առաջին նախագահն իր կողքին կանգնած է:

ՀՀՇ վարչության նախագահը մեզ խորհուրդ տվեց տեղեկությունը հստակ ճշտելու համար գնալ Ազատության հրապարակ եւ անձամբ տեսնել Տեր-Պետրոսյանին, ավելին` ծանոթանալ նրա հետ եւ մի հատ էլ լուսանկարվել:

Արամ Մանուկյանը հերքեց նաեւ տեղեկություններն այն մասին, թե այսօրվա հանրահավաքը չի կայանալու:

«Հանրահավաքը կայանալու է, բայց կարճ է տեւելու` երեւի մեկ ժամ, որից հետո մենք ֆուտբոլին ենք հետեւելու»,- հայտնեց Մանուկյանը եւ հավելեց, որ հավանաբար Տեր-Պետրոսյանը ելույթ չի ունենա: