Կբացվի 4 քոլեջ

Այս ամիս, Եվրոպական Միության աջակցությամբ, ՀՀ ԿԳ նախարարության կողմից կբացվի բարեկարգված և ժամանակակից տեխնիկական միջոցներով հագեցած 4 քոլեջ. տեղեկացնում են ՀՀ ԿԳ նախարարությունից:

Իսկ մինչև տարեվերջ, ինչպես տեղեկացրել է ՀՀ ԿԳ նախարար Արմեն Աշոտյանը, նախկին միջին մասնագիտական կրթական հաստատությունների հենքի վրա ստեղծված նոր քոլեջների թիվը կհասնի 12-ի: Նախարարի խոսքով` մասնագիտական կրթության ոլորտի բարեփոխումների ծրագրում ներառվել է 12 միջին մասնագիտական կրթական հաստատություն. յուրաքանչյուր մարզից ընտրվել է մեկական քոլեջ և երկուսը՝ մայրաքաղաքից:

«Լուրջ ուշադրություն է դարձվել միջին մասնագիտական կրթության բովանդակության թարմացմանը: Հիմնական խնդիրը հմուտ աշխատուժի մատակարարմամբ աշխատաշուկայի պահանջների սպասարկումն է, որը կարող է անմիջականորեն օգտակար լինել նաև տվյալ մարզի տնտեսության զարգացմանը»,- նշել է նախարարը:

Նախարարն ասել է, որ տարիներ շարունակ միջին մասնագիտական կրթության համակարգն անտեսված է եղել, և հանրության կողմից ավելի մեծ պահանջարկ է ունեցել բուհական կրթությունը:

Վիճակագրական տվյալներով` ՀՀ-ում բարձրագույն ուսումնական հաստատությունում սովորող երեք ուսանողին բաժին է ընկնում մեկ միջին մասնագիտական կրթական հաստատության ուսանող, մինչդեռ զարգացած տնտեսություն ունեցող երկրներում այդ հարաբերակցությունը ճիշտ հակառակն է: