Ինչո՞ւ է Կոնգրեսը շարունակում խաբել ժողովրդին

Իշխանությանը տիրանալու բազում անհաջող փորձերից հետո Կոնգրեսին մնացել է վերջին ու ամենաբարդ տարբերակը` աշխատել ժողովրդի հետ, տանել հրապարակ ու իշխանություններին պարտադրել գնալ արտահերթ ընտրությունների: Բնական է, որ նույն հասարակության հետ աշխատում են նաեւ իշխանությունները, սակայն ՀԱԿ ներկայացուցիչ Պետրոս Մակեյանի պնդմամբ, եթե ընդդիմությունը փորձում է ժողովրդից քաղաքացիական հասարակություն ստանալ, ապա իշխանությունը փորձում է այդ նույն ժողովրդին դարձնել ավելի հպատակ:

Լրագրողների հետ այսօրվա հանդիպման ժամանակ, սակայն, Մակեյանն այդպես էլ չպատասխանեց հարցին` ինչո՞ւ է ընդդիմությունը շարունակում խաբել ժողովրդին:

Պետրոս Մակեյանը, որ ժամանակին իշխանության մաս էր, պետք է որ հրաշալի հասկանա` հերթական ընտրություններից վեց ամիս առաջ արտահերթ ընտրություններ պահանջելն առնվազն անհեթեթություն է: Ի՞նչ է այդ դեպքում Կոնգրեսի ուզածը, ինչո՞ւ է անպայման ձգտում արտահերթ ընտրությունների. չէ՞ որ ժամանակին ՀԱԿ-ն ունեցել է իրավիճակն իր օգտին փոխելու հնարավորությունը, բայց բաց է թողել այն ու հիմա փորձում է հավաքել հասարակության` իրենից հիասթափված հատվածին:

«Կոնգրեսը փորձում է երկրին հնարավորինս չվնասել»,- սա էր Մակեյանի պատասխանը:

«Ժողովրդին ուղարկելով տուն` արդյո՞ք դուք էլ փափուկ բարձ չեք դնում ժողովրդի գլխի տակ»,- հարցրեց լրագրողներից մեկը:

Ի պատասխան Մակեյանը մի քիչ կմկմաց, ապա նշեց, որ, իհարկե, փետրվարին այդ հնարավորությունը կար, բայց գործոններ կան, որոնք պիտի հաշվի առնել: Ապա հավելեց, որ Կոնգրեսը հիմա էլ հնարավորություն ունի արաբական տարբերակով գնալու, բայց չի ուզում պատմության մեջ այդ էջն իր վրա վերցնել:

Ինչ վերաբերում է 6 ամսում արտահերթ ընտրություն անելուն, ՀԱԿ ներկայացուցիչը նշեց, որ 6 ամիսը 180 օր է, եւ այդ 180 օրերից ցանկացածի ընթացքում կարելի է պարտադրել ու փոխել իրավիճակը: