Լսել Թուրքիայի հայերին

Թուրքիայի տնտեսական եւ սոցիալական հետազոտությունների հիմնադրամը (TESEV) ներկայացրել է հատուկ զեկույց` «Լսել Թուրքիայի հայերին. հարցեր, պահանջներ եւ լուծման առաջարկներ» վերնագրով:

Ինչպես տեղեկացնում է թուրքական Milliyet-ը, հիմնադրամն առաջարկում է ապահովել պետության աջակցությունը հայկական դպրոցների համար դասագրքերի հրատարակմանը, ուսուցիչների աշխատավարձերի ավելացմանը, համալսարաններում բացել հայոց լեզվի եւ գրականության բաժիններ, պայմաններ ապահովել  հայերենով ռադիո եւ թատրոններ ստեղծելու համար:

«Հաշվի առնելով Լոզանի համաձայնագիրը` պետությունը պետք է հայ ինքնության ու մշակույթի ձուլման դեմն առնի: Այստեղ ապրող հայաստանցի երեխաներին մայրենի լեզուն ուսուցանելը պետք է օրենսդրորեն համպատասխանեցվի  ՄԱԿ-ի՝ երեխաների իրավունքների մասին կոնվենցիային: Դասագրքերում պետք է բացակայեն հայերի հանդեպ թշնամանք եւ ատելություն սերմանող արտահայտությունները: Վերանորոգված եկեղեցիները հարկավոր է հանձնել Ստամբուլում Հայոց պատրիարքարանին եւ թույլատրել այդ եկեղեցիներում իրականացնել պատարագներ»,- նշվում է զեկույցում:

TESEV-ը պահանջում է նաեւ թույլատրել, որ Ստամբուլի Ուսքյուդարի Սուրբ Խաչ դպրեվանքում հոգեւորականներ պատրաստվեն:

Հիմնադրամը զեկույցում անդրադարձել է նաեւ հայ-թուրքական սահմանների բացման հիմնախնդրին: «Հարկավոր չէ կենտրոնանալ Ղարաբաղյան հակամարտության եւ Ցեղասպանության խնդրի վրա` կյանքի կոչելով «զրո խնդիր հարեւանների հետ» գաղափարը»,- նշվել է զեկույցում:

TESEV-ը պահանջում է նաեւ հայտնաբերել Հրանտ Դինքի սպանության իրական մեղավորներին եւ պատժել մեղքի բաժին ունեցող պետական ծառայողներին: