Անօթեւան ընտանիքը կարող էր զրկվել բնակարանից (տեսանյութ)

Թեև ՀՀ կառավարությունը աղետի գոտում բնակարանների բաշխման գործընթացին մասնակցելու համար անհրաժեշտ փաստաթղթերի հանձնման վերջնաժամկետ սահմանել է մինչեւ 2011 թվականի նոյեմբերի 1-ը, սակայն Գյումրիում կան հարյուրավոր ընտանիքներ, որոնք պահանջվող փաստաթղթերը դեռևս չեն հանձնել բնակբաշխման հանձնաժողովին:

«Շիրակ կենտրոն» ՀԿ-ի ներկայացուցիչները տնակային ավաններ կատարած հերթական շրջայցի ժամանակ պարզել են, որ ծայրահեղ ծանր վիճակում, կիսափուլ տնակներում բնակվող որոշ ընտանիքներ փաստաթղթեր չեն հանձնել... տեղեկացված չլինելու պատճառով:

Գյումրու ավտոկայանի տնակային ավանի 104/008 տնակի բնակիչ, երկու անչափահաս երեխաներ խնամող միայնակ մայր Թագուհի Հովհաննիսյանը բնակարան պետք է ստանար դեռևս նախորդ տարի, սակայն չի կարողացել ամբողջացնել պահանջվող փաստաթղթերը, քանի որ նույն հասցեում գրանցված նրա եղբայրը վաղուց բացակայում է Հայաստանից, և նրա գտնվելու վայրի մասին ոչինչ հայտնի չէ: Եթե նախորդ տարի այդ հանգամանքը խոչընդոտ էր համարվում, ապա ՀՀ կառավարության համապատասխան որոշման մեջ փոփոխությունների համաձայն` այս տարի ընտանիքի բացակա անդամների վերաբերյալ անհրաժեշտ հայտարարությամբ նման ընտանիքները կարող են բնակարաններ ստանալ:

Ցավալին այն է, որ այս և, հավանաբար, նման շատ ընտանիքներ չեն իրազեկվել տեղական և մարզային իշխանությունների կողմից, եւ եթե ՀԿ-ի ներկայացուցիչները պատահաբար չթակեինք այս տնակիի դուռը, նրանք այդպես էլ չէին մասնակցի բնակբաշխման գործընթացին և կշարունակեին գոյատեւել իրենց կիսախարխուլ տնակում: