Ամստերդամի համալսարանի ժառանգության ու հատուկ հավաքածուների տնօրենը Հայաստանում է

Մշակույթի նախարար Հասմիկ Պողոսյանն ընդունել է օգոստոսի 21-25-ը Հայաստանում գտնվող Ամստերդամի համալսարանի ժառանգության ու հատուկ հավաքածուների տնօրեն Ստեֆ Շոլտենին:

Ինչպես տեղեկացնում է ՀՀ մշակույթի նախարարությունը, Շոլտենը Երևան է ժամանել՝ քննարկելու հայ տպագրության 500-ամյակին նվիրված շրջիկ ցուցահանդեսի ծրագրի կազմակերպական խնդիրները և նախապատրաստելու Հայաստանի ազգային գրադարանի և Մատենադարանի հետ եռակողմ համաձայնագրի ստորագրումը:

Ցուցահանդեսը նախատեսվում է անցկացնել Հոլանդիայում` 2012 թ. հունիս- սեպտեմբեր ամիսներին և 2012թ. դեկտեմբերից մինչև 2013 թ. փետրվարը Երևանում, կներկայացվի նաև Եվրոպայի մի շարք քաղաքներում, որտեղ հիմնադրվել են հայ տպագրության կենտրոններ: Ցուցահանդեսը կներկայացնի հայ գրի պատմությունը, Հայաստանի աշխարհագրությունը, հայոց պատմությունը, կրոնը և այլն:

Առաջիկայում կողմերը կանդրադառնան նաև ցուցահանդեսի տարածքին, ցուցանմուշների քանակին ու կազմակերպական այլևայլ հարցերի:

Ամստերդամում հայկական տպագրատներ են գործել մինչև 18-րդ դարի կեսերը և այդ հանգամանքով էլ պայմանավորված է հայատառ մեծաթիվ գրականության առկայությունը Ամստերդամի համալսարանի գրադարանի Հատուկ հավաքածուների բաժնում:

Հանդիպման ընթացքում կողմերը նախանշել են նաև ՀԱԳ-ից, Մատենադարանի և հոլանդական հավաքածուներից ներկայացվող հայալեզու հնատիպ գրականության ու ձեռագրերի թեմատիկան: