Հայաստանը մասնակցելու է "Ռիո+20" համաշխարհային գագաթաժողովին

Օգոստոսի 24-ին արտգործնախարարությունում տեղի է ունեցել 2012թ. Բրազիլիայի Ռիո դե Ժանեյրո քաղաքում կայանալիք «Ռիո+20» կայուն զարգացման եւ բնապահպանությանը նվիրված համաշխարհային գագաթաժողովին Հայաստանի Հանրապետության մասնակցության նախապատրաստական աշխատանքները համակարգող ազգային հանձնաժողովի առաջին նիստը, որը վարել են հանձնաժողովի համանախագահներ` արտաքին գործերի նախարար Էդվարդ Նալբանդյանը եւ բնապահպանության նախարար Արամ Հարությունյանը:

Հանձնաժողովի կազմում ընդգրկված են շահագրգիռ գերատեսչությունների, ինչպես նաև հասարակական կազմակերպությունների ներկայացուցիչներ:

Ինչպես տեղեկացնում է ՀՀ ԱԳՆ մամուլի եւ տեղեկատվության վարչությունը, ելույթներով հանդես են եկել ԱԳ նախարար Էդվարդ Նալբանդյանը և բնապահպանության նախարար Արամ Հարությունյանը: Նրանք անդրադարձել են «Ռիո+20» գործընթացի շրջանակներում տեղի ունեցող զարգացումներին եւ այդ համատեքստում Հայաստանի առջեւ ծառացած խնդիրներին, գալիք գագաթաժողովին ՀՀ մասնակցության նախապատրաստական աշխատանքներին եւ այդ ուղղությամբ իրականացվելիք քայլերին:

Միջոցառման ընթացքում ներկայացվել են Ռիո դե Ժանեյրոյի գագաթաժողովին Հայաստանի մասնակցության միջոցառումների ազգային ծրագրի նախագիծը եւ նախապատրաստական թեմատիկ աշխատանքային խմբերի ստեղծման առաջարկը: