Ավտոպատահար` մահվան ելքով

Երեկ երեկոյան Լոռու մարզի Սպիտակի ոլորաններում` «Մշո Խնուս» ռեստորանային համալիրի մոտ տեղի ունեցած ավտովթարից զոհվել է ՀՀ ճանապարհային ոստիկանության երկրորդ սպայական գումարտակի հինգերորդ սպայական վաշտի տեսուչ, ոստիկանության լեյտենանտ 49-ամյա  Թորգոմ Մելքոնյանը. տեղեկացնում է Վանաձորի մեր թղթակիցը:

Ալավերդու բնակչուհի` 1972 թ. ծնված Նորա Էվոյանը, իր «Միցուբիշի Պաջերո» մակնիշի ավտոմեքենայով դուրս է եկել հանդիպակաց գոտի,  բախվել դիմացից եկող`  Թորգոմ Մելքոնյանի ՎԱԶ-21012 մակնիշի ավտոմեքենային: Երկու վարորդներն էլ ծանր մարմնական վնասվածքներով տեղափոխվել են Սպիտակի հիվանդանոց: Թ. Մելքոնյանը հիվանդանոցում մահացել է, իսկ Ն. Էվոյանի առողջական վիճակը բժիշկները գնահատում են բավարար:

Ավտոմեքենաները տեղափոխվել են ՃՈ տուգանային հրապարակ: Ոստիկանության ԼՄ վարչության Սպիտակի բաժնում դեպքի առթիվ հարուցվել է քրեական գործ, նախապատրաստվում են նյութեր: