Դավիթաշենի կամրջի հիմնանորոգման աշխատանքներից փոխքաղաքապետը գոհ է

Սեպտեմբերի 15-ին Դավիթաշենի կամուրջը կհանձնվի շահագործման:

«Թեեւ պայմանագրային պարտավորությունները լրանում են հոկտեմբերին, սակայն մենք կապալառուին առաջարկել ենք աշխատանքներն ավարտել մինչեւ սեպտեմբերի 15-ը»,- այսօր լրագրողներին տեղեկացրեց Երեւանի փոխքաղաքապետ Կամո Արեյանը`հավելելով, որ վերակառուցման աշխատանքներն իրականացնում է ոլորտում մասնագիտացած «Կամուրջշին» ընկերությունը:

«Դավիթաշենի կամուրջը բավականին բարդ կառույց է, եւ այնտեղ ամեն շինարար չէր կարող գլուխ հանել: Կարող եմ ասել, որ իսկապես որակյալ աշխատանք է իրականացվում»,- նշեց նա:

Նշենք, որ Դավիթաշեն կամրջի հիմնանորոգման ծրագիրն իրականացվում է 565 մլն դրամի պայմանագրային աշխատանքների շրջանակներում:

Կ. Արեյանը նաեւ տեղեկացրեց, որ ընթացքի մեջ են նաեւ մայրաքաղաքում առկա մյուս կամուրջների նորոգման աշխատանքները: Դրանց բարեկարգումը կշարունակվի նաեւ հաջորդ տարի: