Հայազգի զինծառայողի սպանությունը կանխամտածված է եղել

Այսօր Թուրքիայում կմեկնարկի հայազգի զինծառայող Սեւակ Շահին Բալըքչըի սպանության գործով դատավարությունը:

Սպանության մեջ մեղադրվող Քըվանչ Աղաօղլուի ընտանիքն ու փաստաբանը պնդում են, որ մեղադրյալը պետք է դատապարտվի «անզգուշաբար սպանություն» հոդվածով, սակայն հայազգի զինվորի ընտանիքն ու փաստաբանը հակառակն են պնդում. տեղի է ունեցել «կանխամտածված սպանություն»: Իրենց ցուցմունքներում կանխամտածված սպանության տարբերակն են հաստատել նաեւ ականատես զինվորները:

«Մոտ կես ժամ ուրախ մթնոլորտում աշխատելուց հետո Քըվանչ Աղաօղլուն մի րոպեի ընթացքում ուսից իջեցրեց զենքն ու այն ուղղեց Սեւակ Շահին Բալըքչըի վրա եւ կրակ բացեց»,- ըստ թուրքական Etha գործակալության` իր ցուցմունքում ասել է զինծառայող Հալիլ Էքշին` հերքելով Աղաօղլուի այն պնդումները, թե «զենքն ուսից իջեցնելու պահին պատահմամբ է կրակել»:

Հիշեցնենք, որ Սեւակ Շահին Բալըքչըն սպանվել էր ապրիլի 24-ին: Հետաքրքիր է, որ այդ փաստը հիշեցնում են նաեւ թուրքական լրատվամիջոցները` նշելով, որ նա սպանվել էր ապրիլի 24-ին` Հայոց ցեղասպանության հիշատակի օրը, եւ դա զուգադիպություն լինել չի կարող: Ի դեպ, զարմանալի է, բայց նույն լրատվամիջոցները գրում են Հայոց ցեղասպանություն եւ նույնիսկ` առանց չակերտների: